Biz ustoz Rustam To'xtamurodovichni yubiley sanasi bilan barcha bekobodlik muxlislar nomidan, klub rahbariyati, murabbiylar shtabi hamda o'yinchilari nomidan samimiy tabriklaymiz. U kishiga uzoq umr, sihat salomatlik, oilaviy tinchlik xotirjamlik tilaymiz. Hamisha farzandlar va nevaralar kamoli, shodlik va quvonchini ko'rib yurishlarini tilaymiz.
“Metallurg” jamoasi kuchlilar safida birinchi marta Rustam Mirsodiqov rahbarligida eng yaxshi natijasini 2002 yilda qayd etgan bo'lib, jamoa 5-o'rinni egallagandi. Jamoa o'tgan mavsum ana shu muvaffaqiyatini takrorlab, ustozni yana bir bor xursand etganligi tabiiy. Rustam To'xtamurodovich “Metallurg” klubini eng ko'p boshqargan murabbiy sanaladi. U kishining rahbarligida Bekobod shahri jamoasi 11 yil O'zbekiston milliy chempionati, oliy liga bahslarida ishtirok etgan. SHu yillar davomida jamoa R.Mirsodiqov bosh murabbiyligi ostida 310 ta o'yinda maydonga chiqib, 113 ta o'yinda g'alaba nashidasi surgan. 62 uchrashuvda esa “Metallurg” raqiblari bilan durang o'ynagan va 401 ochkoli bo'lgan. Jamoa deyarli kuchli o'ntalikni tark etmagan, bir marta beshinchi, ikki martadan oltinchi, ettinchi va sakkizinchi o'rinlarni egallagan.
O'zbek futboli murabbiyligi sohasida o'ziga xos o'rin tutuvchi Rustam Mirsodiqov “Paxtakor”, MHSK, “Do'stlik” jamoalari bilan O'zbekiston chempioni bo'lgan. Klublardagi muvaffaqiyati bois Rustam Mirsodiqov 1997-98 yillarda O'zbekiston milliy terma jamoasida bosh murabbiy sifatida faoliyat olib borgan. 1997 yilgi mavsumda “O'zbekistonning eng yaxshi murabbiyi” sifatida etirof etilgan.
Bugungi kunda farzandlar qurshovi, oila davrasida umrguzaronlik qilayotgan ustoz – Rustam To'xtamurodovichni yana bir bor muborak 65 yoshlari bilan samimiy tabriklaymiz!
Bosh sahifaga
1893