Xabaringiz bor, Superliga 2-turida 30 mart, shanba kuni “Dinamo” jamoasi Termizda “Surxon” klubi mehmoni bo'ladi. SHiddatli va qiziqarli o'tishi kutilayotgan ushbu bahsda samarqandlik haqiqiy jonkuyar muxlislarni safimizga qo'shilishlarini va Samarqand sharafini himoya qiladigan “Dinamo”ning Termizdagi “12-o'yinchisi”si bo'lishga chorlab qolamiz.
“Dinamo” klubi matbuot xizmati va fan-klubi 2019 yildan boshlab ishni yangicha tarzda yo'lga qo'yishni rejalashtirishgan. Xususan, 2-tur o'yini “Surxon” - “Dinamo” uchrashuviga borishda Samarqand – Qashqadaryo - Surxondaryo yo'nalishi bo'ylab sayohat ham uyushtiriladi. Yani, safar davomida diqqatga sazovor joylar ziyorat qilinadi.
Safar rejasidan faqat futbol emas, ayni bahor ayyomida Qashqadaryo vohasining go'zal tabiati, Surxondaryoga kirishda esa Boysun tog'laridagi chiroyli manzaralarda bo'lish, barra tandir go'shtlari, Termizga kirishda esa Al Hakim at-Termiziy ziyoratgohini ziyorat qilish kabi maqsadlar o'rin olgan. Stadionda esa “Dinamo”ni o'zgacha tarzda qo'llab-quvvatlash maqsad qilingan. Samarqandlik ishqibozlar ishtirokidagi ushbu sayohat foto va video tarzda esdalik uchun olinadi va “Dinamo” matbuot xizmati tomonidan sarguzasht sifatida klubning internetdagi sahifalari va saytlarda elon qilinadi!
Bu hali hammasi emas! Safar davomida “Dinamo” muxlislari avtobusda zerikib qolmasliklari uchun viktorina o'ynaladi. “Dinamo” matbuot xizmatining klub tarixiga oid savollariga aniq javob bergan muxlislarni esdalik sovg'alar kutmoqda! Har bir g'olib-muxlis klubning internetdagi sahifalarida tanishtiriladi va elon qilinadi!
Samarqand – Termiz – Samarqand yo'nalishidagi umumiy 750 kilometr (375+375 km) yo'lni tashkil etadigan bir kunlik futbol sayohatiga zamonaviy avtobuslarda borib kelinadi. Safarga 30 mart, shanba kuni saharlab, «Dinamo» stadioni yonidagi fan-klub binosi (oldingi kassa) oldida soat 6:00 dan boshlab yig'ilib, soat 7:00da Samarqanddan Termizga jo'nab ketiladi. Zamonaviy avtobuslarda 1 kishi uchun borib-qaytish yo'l haqi, sayohat, ertalabki nonushta – umumiy 40 ming so'm!
Xo'sh, samarqandlik jonkuyar futbol muxlislari hamrohligidagi quvnoq davrada O'zbekistonimiz bo'ylab unutilmas sayohat va “Dinamo”ni qo'llab-quvvatlashga tayyormisiz? Safarga borishni maqsad qilgan muxlislarni 29 martgacha soat 9:00dan - 17:00 gacha «Dinamo» stadioni yonidagi fan-klub ofisida oldindan ro'yxatga olish boshlangan.
Bosh sahifaga
273