Ayollarimiz Olimpiadaga yo'llanma olishlari uchun...

O'zbekiston terma jamoasi o'rin olgan "B" guruh saralash bahslariga Toshkent mezbonlik qiladi. Raqiblarimiz Vetnam, Iordaniya va Gonkong. Jami guruhlar soni 3ta.

"A" guruhi mezboni Myanma. Ulardan tashqari Hindiston, Indoneziya va Nepal terma jamoalari bor. "S" guruhi o'yinlari neytral maydonda bo'lib o'tadi. Qatardagi saralash o'yinlarida Xitoy Taypei, Eron, Filippin va Falastin terma jamoalari kurash olib boradilar. Har bir guruhdan bor yo'g'i BITTADAN jamoa keyingi bosqich yo'llanmasini qo'lga kiritadi.

Osiyoda tutgan o'rnidan kelib chiqib, dastlabki ikkita saralash bahslaridan ozod etilgan Avstraliya, Xitoy, SHimoliy va Janubiy Koreya hamda Tayland olimpiya terma jamoalari yuqoridagi 3ta guruh g'oliblari bilan 2ta guruhni tashkil qilib guruhdagi 2ta o'rin uchun bahs olib boradilar. Bu musobaqa 2020 yil yanvar yoki fevral oylari bo'lib o'tadi.

Guruhda 1 va 2-o'rinlarni qo'lga kiritgan jamoalar mart oyida o'zaro bahs yuritadilar. 4ta jamoa ishtirok etadigan musobaqada uchtalikka kirgan terma jamoalar va nihoyat Tokioga boradi.

O'zbekiston olimpiya terma jamoasi Rio-2016 saralash bahslarida xuddi shu bosqichda 2-o'rinni olib 3-bosqichga chiqa olmagan edi. O'shanda ham guruhimizda Iordaniya terma jamoasi bo'lgan. Aynan ular guruh g'olibiga aylangan edilar. Guruhimizdagi yana bir raqibimiz Vetnam esa 3-bosqich g'olibi sifatida final raunddagina imkoniyatlarni boy bergan.