- CHempionat boshlanishini uzoq kutdik. Tarkibimizni ko'rib turibsiz, yoshlardan iborat. Yigitlar ko'rsatmalarni imkon qadar yaxshi bajarishdi. O'yin davomida ikki tomonda ham g'alabani ilib ketish imkoni bor edi. Bugun omad biz tomonda bo'ldi deyish mumkin. Oxirgi daqiqada g'alabani qo'lga kiritdik.
- "Mashal" o'tgan mavsum ham Pro-Ligani Samarqanddagi g'alaba bilan boshlagandi. Aytingchi, Pro-Liga "A" saviyasi qay daraja o'zgargan?
- Bu savolga javob berishga erta deb o'ylayman. Ha, "Surxon" va "Dinamo"ning Pro-Ligada endi yo'qligi baribir saviyaga tasir qilsa kerak. Ammo chempionat endi boshlandi, shunday ekan Pro-Liga-2019 saviyasi oshdi yoki pasaydi deyishga hali qiynalaman. Keling, yana kamida 10 tur o'tkazaylik, keyin bu borada javob berish mumkin bo'ladi.
- PFLning yil boshidagi qarori "Mashal"ga qanday tasir qildi? Klub oldiga bu yil Superligaga chiqish vazifasi qo'yilganmi?
- "Mashal" jamoasi bu yildan o'z strategiyasini o'zgartirib, asosiy vazifa sifatida yoshlarni tarbiyalab yuqori saviyaga olib chiqishni belgilagan. Jamoa tarkibi to'liq yangilandi, o'tgan yilgi tarkibdan 17 nafar futbolchi jamoani tark etdi. Yangi yoshlarni yangi darajaga chiqarishni maqsad qilganmiz. "Mashal" oldiga aynan Superligaga chiqish vazifasi shart qilib qo'yilmagan bo'lsa-da, bilasiz, Muborak klubi doim har o'yinda g'alabani maqsad qilishi bilan ham nom qozongan. SHunday ekan, vaqt ko'rsatadi balki barcha o'yinlarda eng ko'p ochko jamg'arib, Superligaga chiqarmiz. Kurashishimiz aniq.
- "Mashal" tarkibiga nazar tashlab, faqatgina tajribali Bahodir Murtazoevni tanidik. Yosh tarkib bilan Superligaga chiqishingizga o'zingiz ishonayapsizmi?
- Orzu qilishdan qo'rqmaslik kerak. Gohida orzular amalga oshadi. Har o'yinda g'alaba qozona olsak, nega Superligaga chiqmasligimiz kerak? Biz albatta har o'yinda g'alaba uchun intilamiz.
Usmon Ibodov yozib oldi
Bosh sahifaga
232