Mazkur vaziyatga oydinlik kiritish maqsadida O'zbekiston futbol associaciyasi Hakamlar va Nazoratchilar Departamenti direktori Mamur Saidqosimov bilan bog'landik.
Tabiiyki savol o'yindagi bahsli holatlar bo'yicha bo'ldi.
O'FA Hakamlar va Nazoratchilar Departamenti direktorining so'zlariga ko'ra, Superliga uchrashuvlarini O'FA binosi ichida hakamlar departamentining tahliliy guruhi onlayn ravishda ko'rib borishadi va hakam qarorlari bo'yicha o'z xulosalarini berishadi. Bugungi bahs ham bundan mustasno bo'lmagan.
Hakamlar departamentidagi tahliliy guruh xulosasiga ko'ra, "Paxtakor" - "Nasaf" (2:1) uchrashuvini boshqarib borgan Aziz Asimov o'yinning 7-daqiqasida "Nasaf" jarima maydonchasi ichida yuzaga kelgan vaziyatda adashgan. Yani, "Nasaf" himoyachisi Mannonov Jaloliddin Masharipovga nisbatan qoidani buzgan, ammo Asimov mazkur vaziyatni ko'zdan qochirgan va belgilanishi mumkin bo'lgan 11-metrlik "nuqta"ni ko'rsatmagan.
Qolgan vaziyatlar, xususan 11-daqiqadagi belgilangan penalti to'g'ri deb topilgan. Xulosaga ko'ra, takroriy lavhada to'p "Nasaf" himoyachisi G'olib G'aybullaevning qo'liga tekkani ko'ringan va penalti to'g'ri belgilangani aytilgan.
Aziz Asimov tomonidan uchrashuvga qo'shib berilgan daqiqalarda "Paxtakor"ning g'alaba to'pi ham qoidalarga mos ravishda kiritilgani aytildi. O'FA Hakamlar Departamentidagi tahliliy guruh xulosasida gol to'g'ri inobatga olingani takidlandi.
Gol urilgan vaziyat, yani Akrom Komilovning to'pni darvozaga tepish chog'ida "Paxtakor" futbolchilari Marat Bikmaev va Egor Krimec o'yindan tashqari holatda bo'lmagan. Ikkinchi epizodda esa to'pga Bikmaev emas, balki Eshmurodov o'ynagani aytilgan. Qo'shimchasiga, o'sha vaziyatda qanot hakami Rasul Fozilov to'pga himoyachi o'ynaganini aniq ko'rganini takidlagan. SHu boisdan ham gol bo'lganini qayd etib ishonch bilan maydon markazi tomon yugurgan.
SHu tariqa mazkur uchala bahsli va savollar paydo bo'lgan vaziyatlarga O'FA Hakamlar va Nazoratchilar Departamentining tahliliy guruh xulosasiga ko'ra, "Paxtakor"ning har ikkala goli haqqoniy kiritilgan. Ungacha bo'lgan vaziyatda esa maydon egalari foydasiga penalti belgilanmaganligida Aziz Asimov adashgan xolos.
Qayd etish kerakki, bu O'FA Hakamlar va Nazoratchilar Departamentining uchrashuvdan keyingi dastlabki xulosasi. Buni bizga mazkur bo'lim rahbari Mamur Saidqosimov malum qildi. Ular esa Sport kanali takroriy lavhalari orqali vaziyatga baho berishgan.
Mamur Saidqosimovga ko'ra, ertaga mazkur o'yindagi hakamlik va vaziyatlar qayta ko'rib chiqilishi mumkin.
SHuningdek, Mamur Saidqosimovga nega markaziy o'yinga malakaliroq hakam tayinlanmadi, degan savol bilan murojaat qildik. CHunki aynan Asimov boshqargan 2017 yildagi "Paxtakor" - "Bunyodkor" uchrashuvida ham hakamlarning, ayniqsa yon qanot hakamining qo'pol xatosi yakunda katta mashmashalarga sababchi bo'lgani eslatildi. Mutaxassisning fikriga ko'ra, Aziz Asimov ayni paytda xalqaro o'yinlardagi ishi bilan barchada iliq taassurot qoldirmoqda va uning darajasi mazkur bahs statusiga mos tushadi. Qo'shimcha sifatida, o'tgan yilgi Osiyo o'yinlari finalida ham aynan Asimov ishlagan va bahsni juda yaxshi boshqarib borgan. Kelajakda esa Aziz Asimov yanada katta o'yinlarda, xususan OCHLdagi muhim bahslarda ham ishlashiga ishonishini takidladi.
Eslatib o'tamiz, uchrashuvdan keyin "Nasaf" bosh murabbiyi Ro'ziqul Berdiev Aziz Asimovning ishidan ko'ngli to'lmaganini yashirmadi hamda o'yin hakam tomonidan "buzib" qo'yilganini takidladi. Markaziy bahslarda malakali, salohiyati va darajasi yuqori bo'lgan hakamlar qo'yilishi maqsadga muvofiqligini aytib o'tdi. Berdiev o'yindan keyin kiyinish xonasida yosh futbolchilar yig'lab o'tirganini qo'shimcha qilib, "Paxtakor" o'yinni buzib qo'ygan hakamlar yordamiga muhtoj emasligini aytdi.
2017 yili Mirjalol Qosimov ham aynan Aziz Asimov boshqargan o'yindan keyin "Paxtakor" hakamlar yordamiga muhtoj emasligini aytib, hakamga insof tilagandi.
P.S. Qayd etish kerakki, takroriy lavhalarda mazkur holatlar bo'yicha aniq fikr bildirish biroz qiyin. CHunki takroriy lavhalarda belgilangan penalti va ikkinchi goldagi vaziyatda to'pga kim o'ynagani aniq ko'rinmagan. O'FA Hakamlar va Nazoratchilar Departamenti xulosasi esa asosan o'sha o'yin efiridagi lavhalar orqali chiqarilgan. Saytimiz operatorlari tomonidan tasvir olingan pallada belgilangan penaltidagi holat mavjud. Ertaga mazkur vaziyatni ham "CA" obektividagi variantini etiboringizga havola etamiz.
SHahboz Beg'amov
Bosh sahifaga
233