Andrey SHipilov: Barcha maydonlar ham Samarqanddagidek ajoyib holatda emas...

- Samarqandda o'ynash doim yoqimli – ajoyib maydon, yaxshi atmosfera, ajoyib futbol havosi. “Dinamo” jamoasini haqli g'alaba bilan tabriklayman. Futbol shunaqa, xatolarni kechirmaydi. Raqib jamoa 95 daqiqa g'alaba uchun kurashdi va janobi omad ham oxirigacha kurashgan tomonga kulib boqdi. Bizda yaxshi imkoniyatlar bor edi, ammo foydalana olmadik. O'yin nazoratini qo'ldan chiqarmagandik. Ikkinchi bo'lim yakunida nimalar bo'lganini tushunmay qoldim. Biz ungacha vaziyatlardan gol urib, masalani hal qilishimiz kerak edi. O'yin oxirida esa xatolarimiz golga olib keldi.

- Server Jeparov jarohat olib maydonni tark etdi. Bu borada qanday izoh bera olasiz?

- Jeparovning holati alo emasdi, ammo o'yin oldidan shifokorlarimiz Serverning o'yinga tayyorligini aytishdi. Uning zaxiradan tushirilishi ham rejamiz edi, ammo maydonga tushgach, kutilmaganda jarohat oldi. Balki ikkita zaxira borasida xatoga yo'l qo'ygandirmiz. Ammo bu o'zini oqlash emas, sababi menda zaxirada yana qator futbolchilar bor edi.

- “Metallurg” o'tgan uch turda “Surxon” (1:1), “Buxoro” (2:0) va “Dinamo” (1:2)ga qarshi maydonga tushdi. Siz raqiblar o'rtasida qay daraja farqni ko'rdingiz?

- Bu shaxsiy fikrim – kamida 7-turgacha Superligadagi barcha jamoalarning holati va saviyasi bir xil bo'ladi. Keyin esa futbolchilarning mahorati jamoalarning natijasini belgilab beradi. Hozirda barcha maydonlar ham Samarqanddagi yoki “Paxtakor”, Qarshidagidek holatda emas. SHunga qaramay, Superligada bugunga kelib 60-65 % maydonlar yaxshi holatga kelgan. O'ylaymanki, bir oydan keyin 6-7 tur o'tgach, hammasi o'z o'rnida bo'ladi. Bugungi kunda faqatgina “Paxtakor” va “Lokomotiv” klublarini alohida ko'rsatish mumkin. Ammo ularga ham oson bo'lmasligini “Nasaf” ko'rsatib berdi. Yoki aytaylik, o'z oldiga katta maqsadlar qo'ygan “Navbahor”ning yoshargan “Bunyodkor”ga mag'lub bo'lganini ko'rsatish mumkin. Hozirda tarkibda kimning borligi emas, jamoadagi intizom va kurashuvchanlik ustun kelmoqda. 7-turdan keyin mahoratli ijrochilarga ega jamoa ustun keladi.

- O'tgan uch tur davomida “Metallurg” posboni Safoev PFL tomonidan “oyning eng yaxshi darvozaboni” nomzodlari safiga kiritlgandi. Bugun esa gol urilgan vaziyatda xatoga yo'l qo'ydi. Sizningcha, ham aynan u o'tgan uch turda eng yaxshi bo'ldimi jamoangiz safida?

- O'tkazib yuborilgan 2-golimizda birgina uning xatosi emas, o'sha zarbagacha boshqa futbolchilarimiz ham xato qilishdi. O'tgan uch tur davomida shaxsan men jamoam safidagi eng yaxshi sifatida Abbos Otaxonovni ko'rsatgan bo'lardim.

Usmon Ibodov yozib oldi.