"Temiryo'lchilar" Saudiya Arabistonining Jidda shahrida "Al Ittihod" mehmoni bo'lishadi. "Qirol Abdulloh" stadionida kechadigan bahs mahalliy vaqt bilan 20:45da boshlanadi.
Bu har ikki jamoaning o'zaro uchinchi to'qnashuvi bo'ladi. Malumki, 2016 yil o'tkazilgan Osiyo chempionlar ligasida ham "Lokomotiv" va "Al Ittihod" bitta guruhdan joy olgan va o'shanda ikkala uchrashuv durang natija (1:1) bilan yakun topgandi.
23 fevral kuni o'tkazilgan Toshkentdagi bahsda Sardor Mirzaev gol muallifi bo'lgan. Mehmonlar safida Gelmin Rivas to'p kiritgan. Oradan bir hafta o'tib Jidda shahrida javob uchrashuvi o'tkazilgan va bu o'yin ham 1:1 hisobida yakun topgan.
O'shanda Salli Muntarining goliga zaxiradan maydonga tushgan Temurxo'ja Abduxoliqov penaltidan to'p kiritib javob bergandi. SHundan beri oradan vaqt o'tdi va mana endi Osiyo chempionlar ligasining uchinchi mavsumiga kelib jamoalar yana bir guruhdan o'rin olishdi.
O'tgan vaqt mobaynida "Loko" safida bir qator o'zgarishlar ro'y berdi. 2016 yil "Al Ittihod"ga qarshi maydonga tushganlardan Ignatiy Nesterov, Kaxi Maxaradze, Server Jeparov, Nemanya Yanichich, Sanjar SHoahmedov, SHerzod Fayziev, Marat Bikmaev, Ikrom Aliboev, Sadriddin Abdullaev, Quvondiq Ro'ziev, Jasur Hasanov kabi futbolchilar "temiryo'lchilar" safini tark etishdi. Jamoa sardori sifatida harakat qilgan Timur Kapadze futbolchilik faoliyatiga yakun yasab murabbiylik kasbini boshladi.
Endi ertaga jamoalar uchinchi marta o'zaro kuch sinab ko'rishadi. SHuni aytish lozim, ertangi o'yinga muxlislar kiritilmaydi. CHunki "Al Ittihod" stadioni OFK tomonidan ikkita o'yinga diskvalifikaciya qilingan. "Qirol Abdulloh" stadionida bo'lib o'tgan "Al Ittihod" - "Al Rayan" bellashuviga ishqibozlar kiritilmadi. Ertangi uchrashuv ham shunday tarzda kechadi. Toshkentda bo'lib o'tadigan javob bellashuvi esa 22 aprelga belgilangan.
Quyida 2016 yil Toshkentda va Jiddada o'tkazilgan "Lokomotiv" - "Al Ittihod" bahsini fotosuratlar yordamida esga olamiz.
Bosh sahifaga
111