"Har bir yil boshqasidan farq qiladi. Biz Ispaniya Kubogi finaliga chiqdik. So'nggi vaqtlarda yaxshi o'yin va natija ko'rsatyapmiz deb o'ylayman. "Old Trafford"da qiyin bo'lishini bilamiz, biroq yaxshi natijaga erishishni xohlaymiz.
To'pga egalik qilsak, raqib qarshi hujumlarga tayanishga majbur bo'ladi. MYUda tezkor futbolchilar bor: Rashford, Lukaku. Ingliz jamoalarining futbolchilari kuchli va bo'yi uzun bo'ladi. Gol o'tkazib yubormaslik uchun to'pni nazorat qilish kerak.
MYU hamda PSJ o'rtasidagi o'yin videosini ko'rdim. Bu yaxshi dars bo'ldi. Hech qachon MYUni hisobdan chiqarmaslik lozim. Boshlangan ishni yakunlab qo'yish kerak. "Yunayted"da kuchli yosh futbolchilar etarlicha. Javob uchrashuvining oxirida sodir bo'lgan penalti - o'yinda hamma narsa bo'lishi mumkinligining yorqin misoli. MYU qanchalik xavfli ekanligidan xabardormiz.
Ushbu bahs men uchun o'zgacha ahamiyatga ega bo'ladi. Men bu erda o'sib-ulg'ayib, haqiqiy erkakka aylanganman. Nafaqat maydonda, balki hayotda ham. 17 dan 21 yoshimgacha professional futbolchi bo'lish uchun bu erda tajriba to'plaganman.
Yaxshi va yomon damlar bo'lgan. Bir o'zim yashaganman. Kataloniyaga umuman boshqa inson bo'lib qaytgan edim.
Ule-Gunnar Sulsherni ajoyib jamoadosh sifatida eslab qolganman. Yosh edim, u esa tajribali futbolchilardan biri bo'lgan. U klubga, shaharga ko'nikishimga yordam bergan. Sulsher bilan to'p tepish juda yoqimli edi.
Ule-Gunnar Sulsherning "Manchester Yunayted"dagi ishlari yaxshiligidan xursandman. Jamoa Sulsher qo'l ostida ko'plab g'alabalarga erishdi. Ertaga qiyin bo'ladi, ammo g'alabaga umid qilyapmiz.
"Old Trafford"dagi atmosfera? Jamoamizda tajriba etarli. SHunga o'xshash atmosferali stadionlarda o'ynaganmiz. Biz xavfli vaziyatlar yaratishimiz kerak. Ingliz stadionlari juda shovqinli, ammo bunga tayyormiz.
O'tgan mavsum "Roma"dan uchralgan mag'lubiyat? Futbolda bunaqasi bo'lib turadi. Bu bizga dars bo'ldi. "Barselona" futbolchilari bu klubda yaxshi va yomon damlarni boshdan kechirishgan.
O'tgan yili nima bo'lgani yodimizda va bu qaytarilmasligi uchun bor kuchimizni ishga solamiz" - deydi Pike.
"Manchester Yunayted" - "Barselona" uchrashuvi Toshkent vaqti bilan 00:00da boshlanadi.
Bosh sahifaga
189