"Lokomotiv" o'z maydonida Olmaliq shahrining AGMK jamoasini qabul qiladi. TTYMI stadionida kechadigan bahs soat 16:30da boshlanadi. Bu uchrashuv "Lokomotiv"ning o'z maydonidagi uchinchi o'yini bo'ladi. Avvalgi ikki bellashuvda "temiryo'lchilar" g'alabaga erishishdi. "Loko" dastlab "Navbahor"ni 1:0 hisobida mag'lub etdi va undan keyin "Andijon" 4:0 hisobida dog'da qoldirildi. Har ikkala uchrashuvda maydon egalari o'z darvozalari daxlsizligini saqlab qolishdi.
AGMK esa mavsumni durang bilan boshladi. Jamoa o'z maydonida 1-turda "Buxoro" bilan 0:0 o'ynadi. Keyingi turda "Qizilqum" mehmoni bo'lgan olmaliqliklar 1:3 hisobida mag'lubiyatga uchrashdi. SHundan so'ng AGMK yana maydonida to'p tepdi va raqib "Qo'qon-1912"ni 7:1 hisobida mag'lub etdi.
Mana endi 4-turda ikkala jamoa o'zaro kuch sinashadi. Jamoalar O'zbekiston chempionati doirasida 20 marta to'qnash kelgan. Ustunlik "Lokomotiv" tomonida. "Lokomotiv" ortda qolgan 20ta o'yinning 13tasida g'alaba qozongan va to'rt bor mag'lubiyatga uchragan. Qolgan uch bellashuvda durang qayd etilgan. To'plar nisbati ham "Loko" foydasiga 44-23.
Toshkentda o'tkazilgan 10ta o'yinning 9tasida "temiryo'lchilar" zafar quchgan. Faqat bir uchrashuv durang natija bilan yakun topgan. Bu 2010 yil ro'y bergan va o'yin 0:0 hisobida tugagan. "Lokomotiv" o'z maydonida AGMKga umuman yutqazmagan.
Bosh sahifaga
380