O'zbekistonning amaldagi chempioni "Lokomotiv" safarda "Buxoro" mehmoni bo'ladi. Turnir jadvalida "Lokomotiv" 9 ochko bilan ikkinchi o'rinni egallab turibdi. "Buxoro" esa 5 ochko to'plagan va 7-o'rinda boryapti.
Mavsumni durang bilan boshlagan "Buxoro" keyingi ikkita bellashuvda ham g'alaba qozona olmadi. Baxtiyor Ashurmatov shogirdlari safarda "Metallurg"ga imkoniyatni boy berishdi va uyda "Qizildqum" bilan durang qayd etishdi. "Buxoro" ilk g'alabasini "Qo'qon-1912" bilan o'yinda (3:1) qo'lga kiritdi. Aytish mumkinki, jamoa bu uchrashuvda ancha yaxshi harakat qildi va haqli ravishda g'alaba qozondi.
Mana endi bugun "Buxoro" o'z uyida "Lokomotiv" bilan kuch sinashadi. "Lokomotiv" garchi birinchi turda mag'lubiyatga uchragan bo'lsa-da, keyingi uch uchrashuvda qatorasiga g'alabaga erishdi. Jamoa dastlab "Navbahor"ni, undan keyin "Andijon" bilan AGMKni mag'lub etdi. Mana shu uch o'yinda "Loko" raqiblar darvozasiga 7ta gol urib o'z darvozasidan bitta to'p o'tkazib yubordi.
"Buxoro" shu paytgacha to'rtta gol urib o'z darvozasidan ham shuncha to'p olib chiqqan. Jamoa o'z maydonida bitta uchrashuv o'tkazib bitta gol urgan. Qolgan uchta gol Farg'onada "Qo'qon-1912" darvozasiga kiritilgan. Imkoniyatlar borasida "Loko"ning ustunligini ko'rishimiz mumkin. "Buxoro"ning asosiy ustunligi jamoa muxlislarida. Bugun Buxorodagi markaziy stadion liq to'lishi kutilmoqda.
Buxoro shahrida o'tkazilgan oxirgi besh o'yinning faqat bittasida maydon egalari zafar quchgan. Qolgan to'rtta bahs "Loko" foydasiga hal bo'lgan. Hozircha durang qayd etilmagan.
2018 yil. Birinchi bosqich. "Buxoro" - "Lokomotiv" 0:1
2018 yil. Ikkinchi bosqich. "Buxoro" - "Lokomotiv" 1:3
2017 yil. "Buxoro" - "Lokomotiv" 1:2
2016 yil. "Buxoro" - "Lokomotiv" 2:1
2015 yil. "Buxoro" - "Lokomotiv" 2:3
"Buxoro" o'z maydonidagi oxirgi besh o'yinda "Loko" darvozasiga 6ta gol urib, o'z darvozasidan 10 marta to'p o'tkazib yuborgan.
Bosh sahifaga
118