SHu kuni "Lokomotiv" o'z maydonida Osiyo chempionlar ligasi 4-tur doirasida Saudiya Arabistonining "Al Ittihod" klubini qabul qiladi. Ortda qolgan uchta o'yindan so'ng guruh jadvalining quyi qismida borayotgan "Lokomotiv" keyingi bosqichga chiqish imkoniyatini saqlab qolishi uchun navbatdagi bellashuvda g'alaba qozonishi shart.
SHundagina jamoa hisobidagi ochkolar soni 6taga etadi va guruhdan chiqish imkoniyati paydo bo'ladi. Raqib o'ziga yarasha jiddiy klub: "Al Ittihod" bu yilgi Osiyo chempionlar ligasi ishtirokchilari orasida eng ko'p gol urgan jamoa bo'lib turibdi. Jiddaliklar uchta o'yinda 9ta to'p kiritishgan.
Lekin "Lokomotiv" ham o'ziga yarasha kuchga ega va "temiryo'lchilar" o'z uylarida faqat g'alaba uchun harakat qilishadi. "Al Ittihod" bugun kechki payt charter reys orqali Toshkentga etib keladi va "Hyatt Regency" mehmonxonasiga joylashadi. Jamoa ertaga TTYMI stadionida va o'yindan bir kun oldin "Lokomotiv" stadionida mashg'ulot o'tkazadi.
"Al Ittihod"
"Al Ittihod" 9 aprel kuni "Lokomotiv" bilan kuch sinashgach, shundan so'ng Saudiya Arabistoni Proligasida ikkita o'yin o'tkazdi. Bu jamoa dastlab 13 aprel kuni safarda "Al Nasr" mehmoni bo'lib, 3:2 hisobida zafar quchdi. Mazkur bahsda serbiyalik legioner Aleksandr Priyovichning ikkita va mahalliy hujumchi Fahad Al Muvalladning bitta goli "Al Ittihod"ga g'alaba keltirdi. Lekin shuni aytish kerak, Aleksandr Priyovich OCHL o'yinlariga zayavka qilinmagan.
Jidda klubi kecha o'z maydonida "Al Ittifoq" bilan bellashib 2:0 hisobida g'alabaga erishdi. Ushbu uchrashuvda Abdulaziz Al Bishining ikkita goli jamoaga uch ochkoni taqdim etdi. Yana bir malumot, bu o'yinda "Al Ittihod"ning asosiy futbolchilaridan biri Karlos Vilyanueva 68-daqiqada penaltidan unumli foydalana olmadi. "Al Ittihod" Saudiya Arabistoni chempionatida 28ta o'yindan so'ng 31 ochko bilan 10-o'rinni egallab turibdi.
"Lokomotiv"
"Lokomotiv" ham Saudiya Arabistonidan qaytib kelgach Superliganing ikkita uchrashuvida maydonga tushdi. "Temiryo'lchilar" dastlab 14 aprel kuni TTYMI stadionida AGMKga qarshi bahs olib borib, 2:1 hisobida zafar quchishdi. Bu o'yinda Temurxo'ja Abduxoliqov bilan Islom To'xtaxo'jaevning gollari g'alaba keltirdi.
Kecha esa jamoa Buxoroda 5-tur uchrashuvini o'tkazdi. "Buxoro" jamoasi bilan kechgan bahsda "Loko" 2:0 hisobida zafar quchib qaytdi. Avvaliga 15-daqiqada Arslonmurod Amanov jarima zarbasini qoyilmaqom tarzda amalga oshirib hisobni ochgan bo'lsa, 29-daqiqaga kelib Temurxo'ja Abduxoliqov hisobni 2:0ga etkazdi. SHundan so'ng "Loko" o'yinning qolgan qismini bir tekis o'tkazdi va raqibga gol urish imkonini bermadi. Superligada hozircha 5ta o'yin o'tkazgan "Lokomotiv" 12 ochko to'plagan holda ikkinchi o'rinda boryapti.
Uchrashuv rasmiylari
SHu o'rinda uchrashuv rasmiylarini keltirib o'tsak. 22 aprel kuni bo'lib o'tadigan "Lokomotiv" - "Al Ittihod" bahsini xitoylik hakamlar brigadasi boshqarib boradi. Bosh hakam - Fu Ming. Unga qanotlarda Xuo Veyming bilan Vang Deksin yordam berishadi. Janubiy Koreyalik Kim De Yong zaxira hakami vazifasini bajaradi. Hakamlar nazoratchisi - Jasim Mohamed Abdulkarim (Bahrayn). Uchrashuv komissari esa filippinlik Richard Joson.
22 aprel kuni futbol ishqibozlarini TTZ dahasidagi "Lokomotiv" stadionida kutib qolamiz. Keling, ajoyib futbol spektakli guvohi bo'ling hamda "temiryo'lchilar"ni qo'llab-quvvatlang.
"Lokomotiv" PFK matbuot xizmati.
Bosh sahifaga
1979