Navoiyning "Qizilqum" jamoasi o'z maydonida "Qo'qon-1912"ni qabul qiladi. Turnir jadvalida "Qizilqum" 5 ochko bilan 7-o'rinni egallab turibdi. Qo'qonliklar 2 ochko bilan oxirgi o'rinda borishyapti. Mavsumni ketma-ket ikkita durang bilan boshlagan "Qo'qon-1912" shundan so'ng keyingi ikki bellashuvda imkoniyatni boy berdi.
Qo'qon shahri jamoasi uchun ayniqsa 3-turda AGMKdan uchralgan 1:7 hisobidagi mag'lubiyat alamli bo'ldi. CHunki jamoa shunday hisobda yutqazib qo'yishini hech kim kutmagandi. Jamoa mag'lubiyat tasiridami, keyingi o'yinda ham o'zini ko'rsata olmadi va Farg'onada "Buxoro" bilan kechgan bellashuvda yana yutqazib qo'ydi.
Umuman olganda "Qo'qon-1912" oxirgi ikki o'yinda o'z darvozasidan 10 (!) ta gol o'tkazib yubordi. Buni esa ko'p desa bo'ladi. Bugungi raqib "Qizilqum"ning hujum chizig'i Navoiyda juda yaxshi harakat qilishini inobatga olsak, mehmonlarga oson bo'lmasligini taxmin qilish qiyin emas.
"Qizilqum"ga kelsak, bu jamoa hozircha to'rtta o'yindan faqat bittasida g'alabaga erishdi. Hamidjon Aktamov shogirdlari uyda AGMKni 3:1 hisobida mag'lub etishdi. Bu Aktamovning tarjibali murabbiy Mirjalol Qosimov ustidan ilk g'alabasi bo'lganini eslatib o'tamiz. Navoiyliklar hozircha ikki bor durang qayd etib, bir marta mag'lubiyatga uchrashgan. Jamoa o'tgan turda Bekobodga safar qilib 1:4 hisobida engilib qaytdi. Bu esa "Qizilqum"ning joriy mavsumdagi ilk yirik mag'lubiyati bo'ldi.
Navoiydagi oxirgi 5 o'yin:
2018 yil. Ikkinchi bosqich. "Qizilqum" - "Qo'qon-1912" 1:0
2018 yil. Birinchi bosqich. "Qizilqum" - "Qo'qon-1912" 0:2
2017 yil. "Qizilqum" - "Qo'qon-1912" 3:1
2016 yil. "Qizilqum" - "Qo'qon-1912" 1:1
2015 yil. "Qizilqum" - "Qo'qon-1912" 3:1
Navoiyda kechgan oxirgi beshta o'yinga qarab "Qizilqum"ning ustunligini ko'ramiz. Zero jamoa o'z maydonidagi so'nggi beshta bahsdan uchtasida g'alaba qozongan. Bir marta durang o'ynab, yana bir bor mag'lub bo'lgan. Umumiy to'plar nisbati 8-5, "Qizilqum" foydasiga. Qo'qonliklar beshta uchrashuvdan to'rttasida raqib darvozasiga to'p kiritishni uddalashgan-u, biroq o'tgan yil oxirgi o'yinda gol ura olishmagan.
Bosh sahifaga
421