Jizzaxning "So'g'diyona" klubi o'z maydonida "Paxtakor"ni qabul qiladi. "Paxtakor" turnir jadvalida 13 ochko bilan birinchi o'rinda bormoqda. "So'g'diyona" esa 6 ochko to'plagan hamda 10-o'rinni egallab turibdi.
"So'g'diyona" mavsumni g'alaba bilan boshladi, biroq shundan so'ng qatorasiga uchta bellashuvda mag'lub bo'ldi. Jizzaxliklar safarda "Nasaf" va "Dinamo"ga, uyda esa "Surxon"ga imkoniyatni boy berishdi. Mana shu uch o'yinda "So'g'diyona" faqat bitta gol ura oldi xolos.
Natijada rahbariyat Sergey Lushanga chiqish eshiklarini ko'rsatib, o'rniga o'tgan mavsum "Buxoro"ni boshqargan Ulug'bek Baqoevni taklif etdi. Baqoev boshchiligidagi jamoa o'tgan tur g'alabaga erishdi. "So'g'diyona" "Metallurg"dan 2:1 hisobida ustun keldi.
"Paxtakor" esa mag'lubiyatsiz o'z yo'lida davom etmoqda. SHota Arveladze shogirdlari beshta o'yindan to'rttasida g'alaba qozonib, bir marta durang o'ynashdi. Bugun "Paxtakor" safarda uchinchi o'yinini o'tkazadi. Avvalgi safar uchrashuvini Termizda o'tkazgan "sherlar" 0:0 hisobini qayd etishdi.
Jamoalarning o'zaro oxirgi 5 o'yini:
2018 yil. "So'g'diyona" - "Paxtakor" 0:1
2017 yil. "So'g'diyona" - "Paxtakor" 0:1
2016 yil. "So'g'diyona" - "Paxtakor" 0:1
2015 yil. "So'g'diyona" - "Paxtakor" 0:3
2014 yil. "So'g'diyona" - "Paxtakor" 0:1
Ko'rib turganingizdek, Jizzaxda bo'lib o'tgan oxirgi beshta o'yinda faqat "Paxtakor" g'alaba qozongan. To'plar nisbati 0-7. "So'g'diyona" hatto o'z uyida gol ura olmagan. Eng qizig'i, oxirgi uch yildan beri "Paxtakor" Jizzaxdan faqat 1:0 hisobidagi g'alaba bilan qaytyapti.
Bosh sahifaga
335