“Andijon”: Ertaga “Obod” bilan o'yin

Jamoa azolari bugun ertalab “Futbol-MED” tibbiy ko'rigidan o'tkazildi. Tushlikdan so'ng esa “Bunyodkor” akademiyasiga qarashli suniy maydonda mashg'ulot bo'lib o'tdi. Aytish lozimki, bu Baxtiyor Ashurmatovning yangi jamoasidagi ilk mashg'uloti edi. Yangi murabbiy jamoaga o'zgacha muhit olib kirganini payqash qiyin emas. Har yili professional futbol ligasi tomonidan taqdim etiladigan yangi to'plar ham joriy mavsum uchun bugun olib kelindi va mashg'ulotda futbolchilar yangi to'p bilan ishladi. Mashg'ulotga chiqishdan oldin “Macron” sport firmasining epikirovkasi jamoa azolariga taqdim etilganini ham aytish lozim. 

Qolaversa Baxtiyor Azamovichga murabbiylar shtabida kimlar yordam berishi malum bo'ldi. Unga ko'ra, Zohid Nurmatov, SHuhrat Maqsudov va Kamol Jo'nashev bu yil “Andijon” murabbiylar shtabida faoliyat yuritadi. Darvozabonlar murabbiyi borasida hozircha aniq bir to'xtamga kelinmadi. 

Murabbiylar shtabi ayni damda tarkibdagi barcha futbolchilarni sinchikovlik bilan kuzatmoqda. Ertaga “Obod”ga qarshi kechadigan bahsdan keyin ayrim futbolchilarga javob berilishi mumkin. Eslatib o'tamiz “Obod” bilan o'yin “Obod” stadionida soat 11:30da boshlanishi rejalashtirilgan. 

"Andijon" FK matbuot xizmati.