Baxtiyor Ashurmatov: "Andijon"ni autsayder jamoa deb atashlariga chek qo'ymoqchimiz"

Biz kecha jamoaning mashg'ulotini kuzatib bordik va Ashurmatovga o'zimizni qiziqtirgan savollar bilan murojaat qildik.

- "Andijon" varianti qanday paydo bo'ldi?
- Men jamoa vice-prezidenti Maruf Abdusalomov tomonidan taklif bo'ldi va "Andijon"ga keldim. Viloyat hokimi bilan uchrashuvdan so'ng bosh murabbiy bo'lishga rozilik berdim. So'nggi yillarda "Andijon" autsayderlar orasiga tushib qoldi bunga chek qo'yish fursati keldi. Rahbariyat va mening maqsadim yaxshi jamoa shakllantirsh va muxlislarga yoqadigan o'yin ko'rsatish orqali ijobiy natijalarga erishish. 

- Yangi mavsum boshlanishiga bir oy vaqt qoldi. Barchasiga ulgurasizmi?
- to'g'ri oliy liga boshlanishiga deyarli bir oy vaqt qoldi. Boshqa jamoalar dekabr oyida qilgan ishni biz fevral oyida qilishga majburmiz. Yangi futbolchilarni ko'rikdan o'tkazish, o'yinchilarni jismoniy holatini tiklash, jamoani shakllantirish va o'yinlar o'tkazish... Mana shularning barchasini qisqa vaqt ichida qilishimiz shart. Sababi mavsum boshlanganda vaqt kam edi, ulgurmadik kabi bahonalar o'tmaydi. Andijonlik muxlislar juda talabchan. SHu bois har bir daqiqadan unumli foydalanishga harakat qilamiz.  

- "Qizilqum"da ish boshlagan edingiz...
- dastlab "Qizilqum"da asosan klubning Toshkentdagi ishlarini qilmoqchi edim. Bo'sh vaqtimda chet el klubida tajribamni oshirmoqchi edim. Hakim Aktamov meni murabbiylar shtabida ko'rishni istayotganini malum qildi. Navoiy uyimga uzoqlik qildi, bu orada "Andijon"dan taklif tushdi. SHu bois Hamid G'ulomovich meni to'g'ri tushundi va hech qanday xafagarchiliksiz xayrlashdik. Ular menga yangi ish joyida omad tilashdi. 

- Murabbiylar shtabida kimlar ishlashadi?
- Menga SHuhrat maqsudov, Zohid Nurmatov va Kamol Jo'nashev kabi murabbiylar yordam berib borishadi.

- Jamoaga qaysi futbolchilarni taklif etmoqchisiz?
- Ayni paytda deyarli barcha yuqori saviyadagi futbolchilar klublar bilan shartnoma tuzib bo'lishgan yoki kelishuvga erishib bo'lishgan. SHu bois yaxshi futbolchini topish juda qiyin kechadi. Aytganimdek vaqt oz qoldi. Hozircha bir qator nomzodlar bor, biroq ular bilan kelishuvga erisha olganimizdan so'ng malumot berganim maqul. Hozircha yangilardan Bobur Akbarov yangi mavsumni "Andijon"da o'tkazishi aniq bo'lib ulgurdi. 

Narzulla Saydullaev suhbatlashdi