"Bunyodkor"ning yangi futbolchilari qaysi raqamlarda o'ynaydi?

Tadbir davomida klub rahbariyati Bahodir Nasimov, SHahzodbek Nurmatov, Aleksandr Alempievich, Javlon Mirabdullaev, Sanjar Qodirqulov va Dilshodbek Ahmadaliev kabi yangi futbolchilarni ommaga tanishtirdi.

Oxirgi yillarni "Andijon" va "Metallurg" klubida o'tkazgan himoyachi Javlon Mirabdullaev "Bunyodkor"da 15-raqamda o'ynaydi. Ushbu himoyachi 2014 yilda Meksikada o'tgan o'smirlar o'rtasidagi Jahon chempionati ishtirokchisi hisoblanadi.

"Metallurg" klubidan transfer qilingan hujumchi SHahzodbek Nurmatov "qaldirg'ochlar" safida 11-raqamda to'p tepadi. Nurmatov milliy terma jamoada 3ta o'yin o'tkazgan.

Bahodir Nasimov Samarqandning "Dinamo", Rossiyaning "Rubin", Ozarboyjonning "Neftchi" va Eronning "Padideh" klubida faoliyat olib borgan. Milliy terma jamoa safida 20ta o'yinda maydonga tushib 5ta gol urgan. Nasimov "Bunyodkor"da 14-raqamni oldi.

Serbiyalik yarim himoyachi Aleksandr Alempievich faoliyati davomida Serbiya, Vengriya klublarida to'p tepgan. 2014 yil "Olmaliq" safida o'ynab o'zbekistonlik muxlislarga tanilgan. O'tgan mavsumni "Mladost" klubida o'tkazgan. Alempievich "Bunyodkor"da 71-raqam ostida o'ynaydi.

Yarim himoyachi Sanjar Qodirqulov va himoyachi Dilshod Ahmadaliev o'tgan mavsumni "Obod"da ijarada o'tkazgandi. Ikkala futbolchi ham "Bunyodkor" klubi tarbiyalanuvchilari hisoblanadi. Qodirqulov 26, Ahmadaliev esa 16-raqamlarni tanladi.

Narzulla Saydullaev