Futbolchi 1989 yil hozirgi Saxa Respublikasi (sobiq Yakutiya) Neryungri shahrida tavallud topgan. Ikki yoshida ota-onasi bilan birga Germaniyaga, Fyurt shahriga ko'chib ketgan. Dastlab 2009-2013 yillarda "Groyter Fyurt" klubida o'ynagan. 2013 yildan buyon "Gannover 96" sharafini himoya qilib kelmoqda. Saytimizning Germaniyadagi muxbiri Miron Goyxman Bundesliganing 32-turidan o'rin olgan "Bavariya" - "Gannover" uchrashuvidan so'ng Edgar Prib bilan qisqa intervyu tashkil etdi.
- Sizni yana maydonda ko'rishdan xursandmiz...
- Ha, ikki yil tizzamni davoladim. Ammo hozir barchasi ortda qoldi.
- Tizzangiz boshqa og'rimayaptimi?
- Barchasi yaxshi. Eng asosiysi, yana maydonga tushayapman. O'tgan turda ilk bor maydonga tushdim. Bugun ham. Ha, hozircha faqat zaxiradan tushayapman, ammo vaqt o'tgan sari barchasi yaxshilanadi deb umid qilaman.
- Siz o'ynayotgan "Gannover"ning bu mavsumda omadi kelmayapti...
- Ha shunday. Yana ikkita o'yin bor va ular biz uchun xuddi ikkita finaldek bo'ladi. Ikkala uchrashuvda yutishimiz shart. Bu imkoniyatdan foydalanish uchun bor kuchimizni ishga solamiz. Men esa jamoamga yordam berishga harakat qilaman.
- Jarohat olishingizdan oldin sizga Rossiyadan qiziqish borligi haqida xabarlar chiqqandi.
- Ha, axir Rossiyada tug'ilganmanku. Ammo jarohat oldim va bu imkoniyatni qo'ldan boy berdim.
- "Gannover"dagi sizning sardorlik bog'ichingiz Anton Valdemarga o'tdi. O'zbekistonda uni o'zimizdan deb hisoblashadi...
- U juda ham qobiliyatli futbolchi. Hali yosh va barchasi oldinda. Undan O'zbekiston terma jamoasi haqida so'ragandim, ammo u Germaniyada o'ynashni istashini malum qildi, keyinroq barchasi aniq bo'ladi.
- Klubda qolasizmi?
- Hozircha bu borada gap-so'z bo'lgani yo'q. O'ylashimcha, dastlab bu mavsumni yakunlab olish kerak, shundan keyingina bu borada o'ylaymiz.
- Valdemarda ham shunday vaziyatmi?
- Balki shundaydir. Ko'p narsa keyingi mavsum "Gannover" qaysi ligada o'ynashiga bog'liq bo'lsa kerak.
Miron Goyxman Myunxendan championat.asia sayti uchun maxsus
Bosh sahifaga
1682