Aleksandr Lobanov: "Yutishimiz ham, mag'lub bo'lishimiz ham mumkin edi"

Fozil Musaev jamoasiga qarshi kechgan bahsda jangovor durang (2:2) qayd etildi.

Lobanovning yangi chempionatdagi debyuti munosabati bilan undan qisqacha fikrlarini so'radik.

"Bu erda ochiq futbol ko'rsatilar ekan. Stadiondagi atmosferaga shunchaki gap yo'q. Ikki tomon muxlislari hisob qanday bo'lishidan qatiy nazar, ishqibozlik qilishdan tinmas ekanlar. Bu katta masuliyatni yuklaydi. Bu erda rosmana talab qilishadi. Sababi, klublar futbolchi uchun barcha sharoitni yaratib berishgan. Boshqa jamoalar uchun gapira olmayman-u, lekin "Sepaxon"da futbolga bo'lgan qarash juda zo'r. Futbolchilardan tortib, murabbiy va rahbarlargacha bir-birlarini qo'llab-quvvatlashadi. Meni ham yaxshi kutib oldilar. Hozircha ingliz tilida suhbatlashyapman. Bu borada muammo yo'q", - deydi Aleksandr Lobanov.

- Ligadagi tashkilotchilik haqida nima deysiz, kubok va chempionat o'yinida ishtirok etishga ulgurdingiz?
- Kubok va chempionatdagi o'yinlardan kelib chiqsam, tashkilotchilik alo darajada. Hatto oddiy o'rtoqlik o'yiniga bo'lgan munosabat ham yuqori. Bu erda favorit va autsayder yo'q. Hammaning uch ochko oldidagi imkoniyati bir xil.

- Debyut o'yiningizda 2:2 hisobi qayd etildi...
- Albatta, g'alaba qozona olmaganimiz yaxshi bo'lmadi. Ayniqsa, o'yin so'nggida imkoniyatlardan foydalana olmadik. Lekin mag'lub ham bo'lmadik. Muhimi, chempionlik imkoniyatimiz saqlanib qolingan. O'yindan keyin murabbiy bilan gaplashdim. O'yindagi mayda xatolarni muhokama qildik. Umumiy o'yin borasida u mendan qanoat hosil qilganini aytib o'tdi.

Nodirxo'ja Yuldashev