Gap shundaki, "Andijon" bosh murabbiyi sifatida mavsumni boshlagan Ildar Sakaev 8-turdan keyin sport direktori lavomiziga o'tib, bosh murabbiylik rulini Jamshid Saidovga topshirgandi. "Paxtakor" bilan o'yinda "Andijon"ni aynan Jamshid Saidov rasman bosh murabbiy sifatida olib tushgandi.
Olingan malumotlarga ko'ra, Ildar Sakaev yana bosh murabbiylikka qaytarilgan. Ayni paytda jamoani "Navbahor"ga qarshi bahsga Ildar Sakaev tayyorlamoqda. Jamshid Saidov esa avvalgi o'rni, yani yordamchi sifatida ishini davom ettirmoqda.
Bundan ko'rinib turibdiki, "Andijon" jamoasining mazkur rokirovkasi ish bermagan va hammasi avvalgi holatga qaytarilgan. Klub rahbariyat malum muddat jamoaga boshqa bir mutaxassisni olib kelish borasida ham o'ylagan. Ammo mavsum davom etayotgani tufayli bazi mutaxassislar bilan muzokaraga kirishishning imkoni bo'lmagan. Hozircha jamoa rulida bir turlik tanaffusdan so'ng yana Sakaev o'tirdi. Agarda kelgusi o'yinlarda jamoaning natijalari yaxshi tarafga o'zgarmasa, unda klub rahbariyati boshqa mutaxassis olib kelish borasida jiddiyroq o'ylovga tushishi mumkin.
Eslatib o'tamiz, ayni paytda "Andijon" Superligada 7 ochko jamg'argan holda oxirgidan bir pog'ona yuqori bo'lgan 13-o'rinda joylashgan. Jamoa hozircha yagona bo'lib turgan g'alabani o'z uyidagi ochilish uchrashuvida "Nasaf" ustidan qo'lga kiritgandi. Kelgusi turni jamoa 25 may kuni Namanganda "Navbahor"ga qarshi o'tkazadi.
Bosh sahifaga
1855