Germaniya Kubogi finaliga taraddud ko'rayotgan "Bavariya" kecha klub qarorgohi bo'lmish Zebenershtrasseda mashg'ulot o'tkazdi va final o'tadigan Berlin shahriga uchib ketdi.
Kechagi mashg'ulot Frank Riberi, Aren Robben va Rafinya uchun Zebenershtrassedagi oxirgi ish kuniga aylandi. Mashg'ulotdan so'ng qarorgohdagi barcha xodim va personallar uchala futbolchi uchun xayrlashuv marosimini o'tkazishdi. Klub afonalariga aylangan mazkur futbolchilar bilan barcha xodimlar juda iliqlik bilan xayrlashishdi. Ularga kutilmagan syurpriz va esda qolarli onlarni taqdim etishdi. SHu o'rinda Riberi, Robben va Rafinya ham Zebenershtrasse hamda klubdagi barcha personallarga chuqur minnatdorchilik bildirib, ularni sog'inib qolishlarini alohida takidlashgan.
Qayd etish kerakki, 25 may kuni Berlinda bo'ladigan Germaniya finalidagi "Leypcig"ka qarshi o'yin "RRR", yani "Robberi" va Rafinya uchun "Bavariya" safidagi oxirgi o'yinga aylanadi.
O'tgan haftada Bundesliganing oxirgi turi doirasida "Alyanc Arena"da "Ayntraxt" bilan chempionlik bahsida o'ynagan "Bavariya" yirik 5:1 hisobida g'alaba qozonib, o'z tarixidagi 29-chempionlikni nishonladi. Bu esa Riberining to'qqizinchi, Robbenning sakkizinchi va Rafinyaning ettinchi chempionligiga aylandi. SHuningdek, mazkur chempionlik to'qnashuvida "Robberi" Myunxendagi o'z uyiga aylanib qolgan stadionda oxirgi bellashuvini o'tkazib, mazkur bahsda zaxiradan tushgan holda "Robberi" o'z nomlarini tabloga yozdirib qo'yishga muvaffaq bo'lishgandi. Riberi jamoasining to'rtinchi, Robben esa beshinchi golini urdi.
Eslatib o'tamiz, Frank Riberi "Bavariya" 12, Robben 10 va Rafinya 7 mavsumni o'tkazishdi. Qayd etish kerakki, mazkur futbolchilar "Bavariya" bilan qo'lga kiritilishi mumkin bo'lgan barcha sovrinlarga egaliq qilishgan.
Bosh sahifaga
292