Ro'ziqul Berdiev: "Vaziyatga real qaraymiz, biz ayni paytda kuchli uchlikka kirishga qodir emasmiz"

- Bugun tajriba o'z so'zini aytdi va hal qiluvchi rolni o'ynadi. "Lokomotiv" tajriba evaziga g'alaba qozondi. SHunga qaramasdan futbolchilarimiz oxirigacha kurashishdi. To'g'ri, hayajon sezildi. Lekin jamoamiz kuchli raqib qarshisida yomon ko'rinishmadi. Agarda yaratilgan vaziyatlarni golga aylantirganimizda, unda natija ham qoniqarli bo'lardi. Abduxoliqovning golidan avval Rashidxonov o'z imkoniyatinidan unumli foydalanganida, hammasi boshqacha bo'lishi mumkin edi. Futboldagi sen urmasang, senga urishadi qoidasi amalda ruy berdi. O'ylaymanki, tarkib butkul yangilangani, yosharganiga qaramasdan jamoamiz chizgisidagi o'yinni saqlab qolishga erishdik. "Lokomotiv" bilan ham tengma-teng o'ynadik. Bugungi o'yin uchun futbolchilarga minnatdorchilik bildirdim. SHuningdek, muxlislarimizga ham bizga bildirayotgan ishonchi uchun katta rahmat! Aynan ishqibozlarimiz bizlarni har doim qo'llab, bizga dalda bo'lishmoqda.

Vaziyatga real qaraylik, biz ayni paytda kuchli uchlik uchun kurashishga qodir emasmiz. Tarkib butkul o'zgardi. Bir yilda tuzilgan jamoa bilan yuqori o'rinlar uchun kurashish qiyin. Asosiy maqsadimiz, yosh futbolchilarning tajribasini oshirish, har o'yinga esa maksimal harakat qilish. Yuqori o'rinlar uchun kurashish esa nihoyatda qiyin bo'ladi. Balki ikkinchi davrada tarkibga tajribali futbolchilar qo'shilsa, yoki legionerlar kelsa, balki vaziyat o'zgarishi mumkin.

Biz asosiy tarkibni yo'qotganimizga qaramasdan, o'zimizning uslubdagi, imzoimiz ostida futbolni saqlab qolganimiz katta yutuq. Buni yanada shakllantiri, takomillashtirishga intilamiz. 

Liga Kubogi? Ochig'i bu musobaqa bizga nima berishini bilmadim. Ayni damda ko'plab futbolchilarimiz OTJ yig'iniga jo'nab ketishadi. Biz esa asosiy tarkibga kam tushayotgan yosh futbolchilarga imkoniyat beramiz. Bu musobaqa kim bilan o'ynashimizdan qati nazar o'yin amaliyotisiz qolib ketayotgan futbolchilarni tushirib, maksimal harakat qilamiz.

Islom Kenjaboev mashg'ulotlarda jarohat olgani bois o'yinda ishtirok etolmadi. Bugun uning yo'qligi ham o'z tasirini o'tkazdi. CHunki tezkor futbolchilar orqali raqib hmoyasini yorib o'tmoqchi edik. Lekin bu bahona bo'lib qolmasligi kerak.