Temurxo'ja Abduholiqov: "Turkiyaga qarshi o'yin biz uchun ham juda qiziq"

- Terma jamoaga chaqiruvni ko'p kutib qoldingizmi?

- Oxirgi marta Xitoydagi turnir uchun terma jamoaga chaqirildim. Kutib qoldim deb o'ylamayman. Turkiyaga qarshi bahsga tayyorman.

- O'tgan mavsum asosan zaxiradan maydonga tushdingiz, joriy mavsum esa "Lokomotiv"ning asosiy forvardisiz va deyarli har uchrashuvda gol urishga muvaffaq bo'lyapsiz...

- Avvalgi mavsum Bikmaev bilan birga o'ynadim. Superligaga mavsum o'rtasida kelganim tufayli jamoa va ligaga ko'nikishga vaqt kerak bo'ldi. Bu yil "Lokomotiv" safida o'zgarishlar bo'ldi, buning ustiga kadrlar borasida variantlar kam. Hammamiz jipslashib, ahil jamoadek to'p tepishimiz lozim.

- Mashg'ulotda yaxshi ishtirok etdingiz, vaziyatlardan unumli foydalandingiz...

- Bu mashg'ulot. Mashg'ulotda 10talab gol urishingiz mumkin. Asosiysi o'yinda gol urish.

- Turkiya Evropa qitasining jamoasi, futbolchilari ham kuchli...

- Turkiyaga qarshi uchrashuv biz uchun ham qiziq. Bu uchrashuv orqali jamoa va futbolchilarning saviyasini bilib olamiz.

- Turk muxlislari oldida o'ynash qiyin.

- Ko'ramiz. Bilamiz, turkiyalik muxlislar juda yaxshi atmosfera yaratishadi. Raqib jamoa ishqibozlari bo'lsada, stadion to'lib turishi futbolchilar uchun yoqimli holat.