SHahboz Erkinov: "Barqaror o'yin namoyish etib kelayotgani uchun "Mashal"ni tanladim"

"Bunyodkor" - "Mashal" (2:0) uchrashuvidan so'ng biz hujumchining fikrlari bilan qiziqdik.

"Mashal" rahbariyati menga o'tgan mavsum tugagach taklif bilan chiqishgandi. Muborak klubi bir necha yildan buyon barqaror o'yin namoyish etib kelayotgani uchun shu erga kelishga qaror qildim. Oldimda 3-4ta variant bor edi. O'ylab ko'rib "Mashal"ni tanladim", - deydi Erkinov. 

- Orada Malayziyaga ham borib keldingiz...

- Ha to'g'ri, Malayziyaga borib kelganim ros. Biroq u erga jismonan tayyor bo'lmagan holda borgandim, shu bois qaytishga to'g'ri keldi. Klubda qolishim mumkin edi, ammo fevralgacha kutishim kerak edi. Bu variant menga maqul kelmadi.  

- "Mashal" jamoasi sizni qanday kutib oldi? Raqobatga tayyormisiz?

- Klub meni yaxshi kutib oldi. Bir qator futbolchilar bilan avvaldan tanishmiz. Bu borada muammo bo'lgani yo'q. Albatta, raqobatga tayyorman. Bu o'sishga yordam beradi. Tarkibda yosh hujumchilar ko'p, ularning qanday ishlayotganini ko'rib turibman. 

- Baxtiyor Ashurmatov ketgani uchungina "Navbahor"dan ketdingizmi?

- Bu ham sabablardan biri bo'ldi. Ammo shu yil 90 foizga "Navbahor"dan ketishim aniq edi. Ishonsangiz klubning futbolchilardan hamon qarzi mavjud. "Lochinlar" safiga yangi murabbiy keldi, yangi jamoa shakllanmoqda. SHu bois ketishga qaror qildim.

Narzulla Saydullaev suhbatlashdi