Bugun "Nasonal", shuningdek, 1966 yilgi Toshkent zilzilasi ro'y bergan soniyalarda "Paxtakor" stadionida gol urgan Tojirov tavallud topgan kun!

Agar bugun Vladimir Hasanovich hayot bo'lganida 79 yoshni qarshilardi. Tojirov biroz avval hikoya qilganimiz yana bir "Paxtakor" afsonasi Yuriy Pshenichnikov bilan bir yilda, bir kunda dunyoga kelgan edi. 

Vladimir Tajirov 1940 yilning 2 iyun kuni Toshkent shahrida dunyoga kelgan. "Mehnat rezervlari" jamoasi tarkibida futbolchilik faoliyatini boshlagan. Faoliyatining yorqin yillarini "Paxtakor" safida o'tkazgan. Vladimir 7 mavsum davomida "Paxtakor" sharafini himoya qilgan. 1967 yilda Moskvaning "Lokomotiv" klubi sharafini himoya qilgan. Futbolchilik faoliyatini "Frezer" (Moskva) havaskorlar klubida yakunlagan.

SSSR chempionatlarida jami 225 ta uchrashuv o'tkazib, raqiblar darvozasini 8 marotaba ishg'ol qilgan. Volodya faoliyatini himoyachi sifatida boshlab, yarim himoyachi ampluasida tugatgan. Vladimir "Paxtakor" tarkibida Valeriy Muxin bilan ajoyib tandem hosil qilgandi. 

Uning ikki goli shubhasiz, faoliyatini bezaydi. 1964 yilda "Paxtakor" Toshkentda Urugvayning 25 karra chempioni "Nasonal" klubini qabul qiladi va 2:1 hisobida g'alaba qozonadi. Montevideo klubi Evropa turnesidagi ketma-ket g'alabalardan so'ng aynan Toshkentda mag'lubiyat alamini totib ko'radi. Ergash Karimov ishtirokidagi "Uchrashuv" filmi yodingizda tushdimi? O'sha tarixiy o'yindagi hisobni mehmonlar ochishgan. Tojirov esa o'zining aldamchi harakatlari bilan muvozanatni tiklagan. Ikkinchi bo'limda Valeriy Lyubushin g'alaba to'pini kiritgan. 

Ikkinchi tarixiy gol. 1966 yilning 26 aprel kuni Toshkentda kuchli zilzila ro'y bergan. Aynan zilzila chog'ida "Paxtakor" jamoasi 50 000 muxlis ko'z o'ngida Minskning "Dinamo" klubini qabul qilayotgan bo'lgan. O'shanda uchrashuvdagi yagona golni bugungi qahramonimiz o'z hisobiga yozib qo'ygan edi. Uch himoyachi qurshovida turganiga qaramay, Volodya hammadan baland sakrab, boshi bilan darvozani ishg'ol qilgandi. 

Vladimir Tojirov 2011 yilning 17 aprel kuni Moskva shahridagi Tixoreck bulvardagi uyida vafot etgan. Uning Stanislav (1964 yilda tug'ilgan) ismli o'g'li va Dmitriy (1984 yilda tug'ilgan) ismli nevarasi bo'lgan.