O'yinning 70-daqiqasidan boshlab to'palon boshlandi. Stadionga turli buyumlar uloqtirildi. O'yin yakunida hakamlarga hujum qilishgacha borildi.
O'yin komissari edim. Xavfsizlik masalasida sust ishlandi. Uchrashuv yakuniga etganidan keyin ham mingga yaqin muxlis hakamlarni kutib, stadionni tark etmadi. Hakamlar xavfsiz hududga o'tkazilmagunicha tinchimiz yo'q edi. Oxirida muxlislar bilan tushuntirish ishlarini olib borishga ham to'g'ri keldi. Bir tomonda o'zim, boshqa tomonda Xayrulla Hamidov. Tushunaman, biz borganimiz uchun ham odamlar ichidagi dardni to'kib solishni istadi. Ular yillar davomida yig'ilib kelgan etirozlarini qandaydir 5-10 daqiqada chiqarib tashlashni istadi. Biroq buning iloji yo'q. Odamlar olamonga aylanganida, ularni tartibga keltirish imkonsiz.
Muxlislar bilan gaplashganimizdan keyin ular stadionni tark eta boshladi. Ayrim nashrlarda yozilgani kabi hakamlarni echinish xonasida hech kim urgani yo'q, bularning bari bo'hton. Biroq stadionning o'zida ularni ayab o'tirishmadi. Otilgan buyumlar ulargacha etib bordi, aytganimdek, 4-5 kishi maydonga yugurib chiqib, ularga tashlanishga ham ulgurdi. Bularning bari komissar raportida ham, inspektor raportida ham o'z ifodasini topgan.
Futbol qoidalaridan xabardor inson borki, komissar uchrashuv o'tkazilishi uchun masul ekanini biladi. "Xorazm" klubi tibbiy yordam, o't o'chirish, xavfsizlik masalalarini o'z vaqtida taminlab berdi. Komissar ham, boshqasi ham o'yinni o'rtasida hakamlarni maydondan haydab chiqarish yoki almashtirish huquqiga ega emas. Ular nohaq bo'lsa, ishini ko'rib chiqadigan qo'mita bor. O'yin yakuniga etgach, xavfsiz uchun javobgar tomonning ishi qiyin bo'ldi. Stadionga buyumlar uloqtirilgan vaqtda o'yin to'xtatildi, shundan keyin stadion tartibga keldi. Biroq o'yin yakuniga etganidan keyin mehmon jamoa ham, hakamlar ham odamlar nafratidan jabr ko'rdi. Muxlislar stadionni tark etishni istamadi.
Video. "Xorazm" - "Mashal". Uchrashuvidan keyingi voqealar aks etgan video tarqaldi
Besh qo'l barobar emas. Vaziyatni tushunadigan, olamonning ishi noto'g'ri ekanini qayd etayotgan va ularni tinchlantirishga ko'mak bergan xorazmliklarga minnatdorchiligimni bildiraman. Hakamlar ham, inspektor ham o'z manziliga eson-omon etib oldi, o'yinni o'tkazish uchun masul sifatida uni o'tkazdim. Biroq buyog'iga organ hodimlari ham vaziyatni o'rganib chiqishi kerak. CHunki bu kabi ishlar yana takrorlanishi mumkin. SHuningdek, O'FA ham bu kabi illatga qarshi jiddiy kurashishi shart.
P.S. Xorazmga birinchi borishim edi, esda qoladigan bo'ldi. Olimpiya stadioni uchun hukumat pul topib beribdi, stadionda ish ketyapti. "Lokomotiv" stadioni maysasi uchun javobgar shaxslar bilan ko'rishdik. Akademiya uchun joy yaxshi, klub bazasi haqida ham o'ylash kerak. Hokim futbolga ko'p ham qiziqmaydi, shundan kelib chiqib bu klubning ham yaxshiroq homiysi bo'lsa, balki "Xorazm" avvalgi mavqesini tiklab olar. Kechagi to'palon sabab stadionda ancha qolib ketdik. SHuning uchun trolleybusga chiqish rejasi o'xshamadi.
Bazi nashrlardan xabar yozayotganda surishtiruv o'tkazishni iltimos qilardim. OAV o'zi berayotgan noto'g'ri axborot uchun javobgar ekanini unutmasligi kerak. Qolaversa, OAV vakillari meni ham, Hamidovni ham yaxshi tanishadi va bemalol topa olishardi. Kecha Xorazmda ekanimizni ham yaxshi bilishardi. Rasmiy shaxslardan qandaydir axborotni tekshirib olish qiyin emas, jurnalist etikasiga rosa mos tushadigan ish", - deb yozdi Diyor Imomxo'jaev telegramdagi o'z kanalida.
Bosh sahifaga
226