O'zbekiston milliy terma jamoasi mehribonlik uyi tarbiyalanuvchilari bilan uchrashdi

"Jar" stadionida o'tgan tadbirga Toshkent shahridagi 21 va 23-mehribonlik uylari tarbiyalanuvchilari tashrif buyurishdi.

Dastlab tadbir boshlovchisi Davron Fayziev futbolchilar va murabbiylar shtabini bolalar bilan tanishtirib chiqdi. Keyin esa mehribonlik uyi tarbiyalanuvchilari va terma jamoa futbolchilari ikki jamoaga aralash ajralib, 15 daqiqacha davom etgan futbol o'yinida to'p tepishdi. Unda bolalar o'zlarining sevimli futbolchilari bilan birga o'ynash imkoniyatiga ega bo'lishdi.

Futbol uchrashuvidan keyin mehribonlik uylari tarbiyalanuvchilariga esdalik sovg'alari taqdim etildi.

Tadbirda O'FF va "Terma jamoalar markazi" rahbariyati va xodimlari ham ishtirok etishdi. Bunday tadbir hamda uchrashuvlar o'sib kelayotgan yosh avlodda sport, xususan futbol va sog'lom hayot tarziga bo'lgan qiziqishni o'stirishi tabiiy. Terma jamoadagi futbolchilarga havas bilan maydonda to'p tepgan bolalar kelajakda ular kabi bo'lishga intilishsa, shuning o'zi ham katta muvaffaqiyatdir.