"Lokomotiv" bo'lajak raqib nomini kutyapti

Turnir jadvalida 11-o'rinni egallab turgan “Ash-SHarja” klubiga qarshi kurash olib borgan Ivan Yovanovich shogirdlari 4:1 hisobida muvaffaqiyat qozonishdi. Bunda “An-Nasr” safida harakat qilgan CHili, Kongo, Burkina Faso hamda braziliyalik legioner yigitlarning hissasi katta edi.

Jumladan, mashhur Nilmar 36-daqiqaga qadar xet-trik qayd etgan bo'lsa, 44-daqiqada kongolik legioner Kembo-Ekoko penaltini aniq amalga oshirdi. Mehmonlar 70-daqiqaga kelibgina hisobni 1 taga qisqartirishdi. 17-turdan keyin “An-Nasr” 3-pag'onadan mustahkam joy egallagan.

Guruh bosqichidagi yana bir raqibimiz – Eronning “Sepaxon” klubi esa 13-o'rinda borayotgan “Fulad”ga imkoniyatni boy berib, o'zi 10-pag'onaga sho'ng'ishga majbur bo'ldi. 70-daqiqada o'tkazib yuborilgan golga hamyurtimiz Fozil Musaev jamoadoshlari javob bera olishmadi.

Eslatib o'tamiz, “Lokomotiv”ning guruhdagi uchinchi raqibi nomi 9 fevral kuni bo'lib o'tadigan “Al-Ittixod” (Saudiya Arabistoni) – “Al-Vixdat” (Iordaniya) o'yinidan keyin malum bo'ladi.

Bevosita o'zimizning futbolchilar haqida gap ketganida, ular 9 fevral kunga rejalashtirilayotgan o'rtoqlik o'yiniga tayyorgarlik ko'rishmoqda. Mashg'ulotlar reja asosida davom etmoqda, jarohatlangan futbolchilar yo'q. Murabbiylar 23 fevral sanasiga qadar jamoani optimal formaga olib kirish uchun tinmay mehnatdalar. 10 fevraldan etiboran ular chempionlar ligasidagi birinchi raqib jamoaga qarshi tayyorgarlikni boshlashadi.