Yaqindagi Vadim Abramov futbolimizdagi o'zgarishlar haqida o'z fikrlarini bildira turib, aynan futbol odamlari kelganidan xursand ekanini yashirmadi va bazi kulguli va mantiqsiz ishlarni barham berilishidan umidvorligini aytdi.
Vadim Abramov: "Bunday issiqda galstuk taqishning nima keragi bor?"
PFL bosh murabbiylar uchun belgilangan rasmiy dress-kodni bekor qildi
Ha, aynan Abramov etiroz bildirgan dress-kod, yani reglamentda alohida joy ajratilib ko'rsatilgan mazkur band endi yo'qoldi:
"6.17 “Texnik zona”da joylashgan o'rindiqlarda zaxiradagi futbolchilar bilan birga jami 14 nafardan ko'p shaxs bo'lmasligi lozim. O'rindiqlarda uchrashuv protokoliga kiritilmagan, kiyimi pala-partish bo'lgan shaxslarni bo'lishi taqiqlanadi. Bosh murabbiylar O'FA talabi bo'yicha kiyinishi shart."
Bu yaxshi. CHunki jahon futbolida ham murabbiylarga qanday kiyim kiyishi tayinlanmaydi yoki majburiy forma yo'q.
Xush, yangi PFL rahbariyati yana qanday mantiqsiz qarorlarni bekor qilishi kerak va nimalarga etibor qaratishi lozim?
Superliganing yangi mavsum avvalida va chempionatning dastlabki turlari o'tkach suniy raqobatni keltiradigan reglamentdagi yana bir mantiqsiz band haqida yozgandim.
O'FA & PFL yoxud ko'pchilikda savol uyg'otayotgan reglamentdagi band haqida
Sog'lom raqobat kerakmi yoki suniy? (tahlil)
PFLning yangi mavsum uchun chiqargan reglamentidagi mazkur band bilan tanishing:
• Superliga klublari o'yin qaydnomasiga 1997 yil va undan keyin tug'ilgan kamida ikki nafar o'yinchini kiritishi va ulardan birini minimum 45 daqiqa o'ynatishi shart. Mazkur futbolchi jarohat olgan holatda hali 45 daqiqa o'ynab ulgurmagan bo'lsa, uning o'rniga ikkinchi yosh futbolchi chiqarilishi lozim. Barcha yosh futbolchilar almashtirilgan bo'lsa, yosh futbolchini yoshi katta futbolchi bilan almashtirishga ruxsat beriladi;
Reglamentdagi mazkur band murabbiylarga ortiqcha muammo va tarkibni aniqlashda suniy raqobat yuzaga keltirmoqda.
Zo'ri, istedodi bori mana "Paxtakor"da bo'ladimi, o'z oldiga yuqori maqsadlar qo'yayotgan "Navbahor"mi yoki "Nasaf"dami farqi yo'q, kerak paytda Oston O'runov, Alijonov yoki Abdixoliqov kabi yorib chiqib kelaveradi. Biz futbolimiz kelajagini kuchli raqobatda pishgan va o'sha "olov"dan chiqib kelgan yoshlarga ishonmoqchimizmi yoki suniy ravishda o'yin amaliyoti olayotgan futbolchilar kerakmi bizga?
Eski O'FA va PFL rahbariyati mazkur masalaga etibor ham qaratmadi. Futbolimiz tepasiga kelgan futbol odamlari esa mazkur masala bo'yicha ham yaxshigina bosh qotirishlariga umid qilamiz.
Dress-kod bekor qilindi. Lekin hali bekor qilinishi va tuzatishga muhtoj holatlar talaygina topiladi. Endigi har bir qaror futbol uchun qanchalik xizmat qiladi yoki yo'q, degan savolni o'rtaga tashlab, keyin yaxshi o'ylab chiqarilishiga ishongimiz keladi.
Davron SHoqurbonov PFL rulida qanday ishlashini albatta vaqt ko'rsatadi. Ammo ishga kirishishdan avval mazkur holatlar hamda uchrashuvga tayinlanadigan va bevosita masul bo'lgan komissarlar borasida ham yaxshi o'ylab ko'rishi, ularni to'liqligicha qaytadan saralab olishi kerak.
SHuningdek, qaysi o'yinni kim boshqarishi haqidagi xabarlarni o'yin kuni, uchrashuvga 2 soat qolganida elon qilinishi kabi kulguli holatlarga ham chek qo'yilishi lozim. Vaholanki OFK ham xalqaro maydondagi uchrashuvlarga hakamlarni eng kami 1 yoki 2 oy avvalroq malum qiladi.
Yangi PFL rahbariyati buyog'iga mazkur muhim 5 masala bo'yicha chuqurroq o'ylab ko'rishi va bekor qilishi kerak bo'ladi, nazarimda.
1. Suniy raqobatni vujudga keltiradigan mantiqsiz band•
2. Hakamlarni o'yin kuni elon qilinishi•
3. Qaysi libosda o'ynashni tanlash imkoniyatini mezbon jamoa ixtiyoriga qaytarish (PFL o'zi tanlayotgandi)•
4. Komissarlarni to'liqligicha saralab olish•
5. Bo'limlarga o'z yo'nalishi bo'yicha/futbol tushunchasi bo'yicha mutaxassislarni qo'yish•
SHahboz Beg'amov
Bosh sahifaga
1371