Maqola muallifi yangi kelgan PFL rahbariyati amalga oshirgan ilk o'zgarish - o'yin paytida murabbiylarga majburan belgilangan dress-kodning bekor qilinishini misol keltirgan holda yana boshqa bir nechta masalaga etibor qaratgan.
Futbolda fikrlar qarama-qarshiligi bo'lgani yaxshi, busiz futbol rivojlanmaydi. Lekin shuni unutmaylikki, futbol konstituciyasi bu - Reglament. Har bir musobaqa uchun mavsum avvalida yangi reglament ishlab chiqariladi va mavsum yakuniga qadar shu bo'yicha ish olib boriladi.
Biz bu yilgi reglamentga xolis bahoni faqat mavsum tugaganidan so'ng berishimiz mumkin. Yana shuni aytish lozim, PFLning avvalgi rahbariyati ham o'zbek futboli rivoji uchun qo'ldan kelgancha ishladi va bundan ko'z yumib bo'lmaydi. Ichki chempionatimiz ozmi-ko'pmi isloh qilindi, bir qator yangiliklar qo'shildi, maydonlar holati yaxshilandi, klublar har jabhada o'sishga erishishdi va hokazo.
Endi dress-kod masalasiga kelsak, bu narsa murabbiylar uchun ortiqcha boshog'riq edi deya olmaymiz. Nima bo'lganda ham bosh murabbiyning zaxira o'rindig'idagilardan ajralib turgani maqul. Kimdir futbolga birinchi marta tushadi va shunda bosh murabbiy kimligini darrov payqab oladi.
Vadim Abramovning issiqda galstuk taqishning nima keragi bor deyishi o'rinli, biroq o'yin 20:00da boshlanganida o'ylaymizki, Abramov bunday demagan bo'lardi. Umuman olganda dress-kod (kostyum-shim, galstuk) etiborga arzigulik muammo emas va buni bekor qilgan bilan nimadir o'zgarib qolmaydi.
Endi Reglamentdagi boshqa bir band - 1997 yil va undan keyin tug'ilgan futbolchining kamida 45daqiqa Superligada o'ynatilishiga kelsak, bu murabbiylar ishtirokida hal qilinadigan masala. Balki hozir bu o'zgarish foyda berayotgandir. To'g'ri, olimpiya terma jamoamiz yoshiga mos keladigan futbolchini majburan o'ynatish sog'lom raqobatga tasir qilyapti, lekin aynan shuning kelajakda o'z foydasi tegishi ham mumkin.
O'ylamizki, PFLning hozirgi rahbari oldida birinchi navbatda kelasi mavsum uchun chiqariladigan reglament ustida ish olib borish turibdi. CHunki bu yil uchun reglament chiqqan va hamma shunga mos o'z o'yinlarni o'tkazib kelyapti. Qolaversa, mavsum yakuniga etmay reglamentni o'zgartirish avvalgi rahbariyat xatosini takrorlash bo'lib qoladi. SHunday ekan, bu yilgi mavsumni qo'limizda bor qoidalarga asosan o'tkazib olgan maqul degan fikrdamiz.
X.Xoliqov.
Bosh sahifaga
261