Futzal. Osiyo chempionati ochilish marosimida muxlislarni syurpriz kutmoqda

Poytaxtimiz mezbonlik qiluvchi qita birinchiligining "A" guruhidagi davtlabki o'yin Livan hamda Qirg'iziston terma jamoalari o'rtasida bo'lib o'tadi. Bellashuv 16:00 da "O'zbekiston" sport saroyida boshlanadi. Barcha muxlislarni ushbu bahsga taklif etib qolamiz. Livan - Qirg'iziston uchrashuvidan keyin 18:00 da "O'zbekiston" sport saroyida Osiyo chempionatining tantanali ochilish marosimi bo'lib o'tadi. Ochilish marosimida hali futzalda qo'llanmagan lazer shouga guvoh bo'lishingiz mumkin. Marosim muxlislarni hayratda qoldirishi shubhasiz. Bir so'z bilan aytganda 10 fevral kuni "O'zbekiston" sport saroyiga tashrif buyuring va barchasini o'z ko'zingiz bilan kuzating.

SHu kuni 19:00 da esa O'zbekiston terma jamoasi musobaqadagi "yurishi"ni boshlaydi. Vakillarimiz birinchi turda Saudiya Arabistoni terma jamoasiga qarshi kurash olib boradi.

Bundan tashqari, shu kuni "Universal" Sport va gimnastika saroyida "B" guruhi vakillari birinchi tur uchrashuvlarini o'tkazishadi. 16:00 da Iroq - Xitoy, 19:00 da esa Eron - Iordaniya o'yini o'tkaziladi.

Eslatib o'tamiz, Osiyo chempionatida dastlabki beshta o'rinni band etgan terma jamoalar shu yilning 10 sentyabridan 1 oktyabriga qadar Kolumbiyada bo'lib o'tadigan Jahon chempionatiga yo'llanmani qo'lga kiritadi.