Ayni paytga kelib, hamyurtimiz K2 ligada 12 ta uchrashuvda maydonga tushib, 1 bora raqiblari darvozasini ishg'ol etishga muvaffaq bo'ldi. “Gvangju” hozirda 17-turdan so'ng 39 ochko jamg'argan holda musobaqa jadvalida yakka peshqadam bo'lib turibdi.
O'zbekistonlik himoyachi O'FA rasmiy saytiga Janubiy Koreyada ishlari qanday ketayotgani xususida gapirib berdi:
“Gvangju” safiga kelib qo'shilganimga 6 oy bo'lib qoldi va jamoaga hamda chempionatga ancha moslashib ulgurdim, deya olaman. To'g'risi, boshida biroz qiyinchilik ham bo'ldi. Zero ilk marta legioner sifatida faoliyat olib boryapman. Lekin jamoadoshlarim, murabbiylarimiz har tarafdan ko'mak berib turishdi va endilikda barchasi joyida.
K2 liga bahslari ham ancha shiddatli va jamoalarning barchasi yuqori divizionga chiqish uchun jiddiy kurash olib borishadi. CHempionat saviyasi yaxshi ekanini takidlay olaman. Har bir klubda 3-4 nafardan yaxshi saviyadagi legionerlar faoliyat olib boradi.
Bizning klubimiz oldiga ham K1 ligaga yo'l olish vazifasi qo'yilgan. Ushbu vazifani uddalashga va yuqori ligaga yo'llanma olishga bor kuch-g'ayratimizni ishga solgan holda harakat qilamiz. Ayni paytda jamoamiz musobaqa jadvalida 1-o'rinda bormoqda. Biz mavsum so'nggiga qadar ushbu o'rinni saqlab qolishga va oldimizga qo'yilgan vazifani uddalashga urinamiz.
Men ham imkon qadar yaxshiroq o'ynashga va jamoamiz muvaffaqiyatlariga xissa qo'shishga intilyapman. Eng asosiysi – men namoyish etadigan o'yin muxlislar va murabbiylarimizga maqul kelishi lozim. Legioner futbolchidan hamisha mahalliy futbolchilardan ko'ra ko'proq narsa kutishadi. SHu sababdan legionerlar bor mahoratini ishga solib o'ynashi talab etiladi.
Hozirgi paytda Janubiy Koreyada 5 nafar hamyurtimiz faoliyat olib boryapti. Ular bilan doim aloqadamiz. O'zbekistonlik futbolchilar o'ynaydigan jamoalarga qarshi ham o'yinlar o'tkazdik. Lekin hali maydonda duch kelmadik. CHunki jarohat sabab hamyurtlarimiz o'sha o'yinlarda ishtirok eta olishmadi.
Ayni damdagi asosiy maqsadim klub safida yaxshi o'yin ko'rsatish va bu orqali terma jamoamizdan chaqiruv olish. Qolaversa, mavsum yakunida Janubiy Koreya K1 ligasiga yo'l olishni ko'zlaganmiz, - dedi mahoratli futbolchi.
Bosh sahifaga
398