Bugun, 16 iyul kuni tajribali hujumchi, Gennadiy Krasnickiy nomidagi O'zbekiston to'purarlari klubi azosi, futbolchilar sulolasi davomchisi SHahboz Erkinov 33 yoshga to'ldi. Qahramonimiz yaqin o'tmishning taniqli futbolchilaridan bo'lgan Furqat Esonboevning farzandi hisoblanadi va tabiiyki, yosh SHahboz boshqa kasbni tanlay olmasdi. Millionlar o'yiniga bo'lgan qiziqish unga qondan o'tgan.
- Otangiz ilk muxlisingiz va shu bilan birga birinchi tanqidchi hamda tahlilchingiz ekanlar...
- Otam nafaqat ilk muxlisim, balki birinchi murabbiyim hamdirlar. Ham hayotda, ham futbolda otamga o'xshashga harakat qilganman. Siz aytgandek, ular mening birinchi muxlisim va tanqidchimlar. Har bir uchrashuvdan so'ng o'yinimni tahlil qilib beradilar. Qaerda xatoga yo'l qo'ydim, qaysi vaziyatda noto'g'ri harakat qildim, hamma-hammasini aytadilar. Nafaqat aytadilar, balki keyinchalik bu xatolarni takrorlamaslik uchun nimalarga etibor berishimni ham uqtiradilar. Malum sabablar bilan o'yinimni ko'ra olmasalar, o'sha uchrashuv yozilgan diskni olib kelib bermaganumcha tinch qo'ymaydilar. Bir so'z bilan aytganda, o'rtamizda hamisha futbol muhokamasi, munozara va tahlili bo'lib kelgan.
SHahboz Erkinov futbolchilik faoliyati davomida "Paxtakor", "Navbahor", "So'g'diyona", "SHo'rtan", "Olmaliq", "PAS" (Eron) jamoalari sharafini himoya qilgan. Joriy mavsumda "Qo'qon-1912" klubi safida o'ynayapti. Bizdagi malumotlarga tayansak, Erkinovning O'zbekiston chempionati oliy ligasida kiritgan gollarni soni 99tani tashkil qilmoqda. Yana bitta goldan so'ng u yuzlik dovonini zabt etadi. 2016 yili "Nasaf"da o'ynab yurgan kezlari faoliyati davomida kiritgan gollari soni 100taga etgandi. O'shanda unga shonli "Paxtakor" jamoasining afonasi To'lagan Isoqov "Gennadiy Krasnickiy klubi"ga qabul qilingani haqidagi sovrinni topshirgan edi.
Kamoliddin Murzoev, yaqin do'sti
- SHahboz bilan olimpiya terma jamoasida o'ynab yurgan kezlarimiz tanishib, qalin do'st bo'lib ketganmiz. Bugungi kunda ham eng yaqin, sirdosh do'stim. Ertalab qo'ng'iroq qilib, tug'ilgan kuni bilan tabrikladim. Yana kamida 5 yil futbol o'ynab bergin, deb niyat qildim. Sizga jo'natgan suratni bugun unga ham yubordim. Do'stligimiz abadiy bo'lsin. Fursatdan foydalanib, do'stimga sog'liq, oilaviy baxt, kelin bilan birga shirindan-shakar farzandlarini rohatini ko'rib yurishlarini tilayman.
Biz ham o'z o'rnida saytimiz ijodiy guruhi hamda o'quvchilarimiz nomidan SHahboz Erkinovni bugungi tavallud ayyomi bilan muborakbod etamiz!
Bosh sahifaga
2625