Konstantin Bakanov 1954 yil Toshkent shahrida tug'ilgan. U "Paxtakor" stadioniga yaqin hududda istiqomat qilgani uchun yoshligidanoq futbol to'garagiga qatnashni boshlagan. 1966 yil Toshkentda ro'y bergan zilziladan so'ng o'quvchilar boshqa shaharlarga jo'natilgan. O'shanda Bakanov Moskvaga jo'nab ketgan va o'sha erda ham futbol bilan shug'ullanishda davom etgan. Uning birinchi murabbiyi Akmal Azizxo'jaev hisoblanadi. Moskvada ikki yil o'qigach, Konstantin Toshkentga qaytadi. U o'zi tug'ilgan shaharni har erdan yaxshi deb sanardi va "Dinamo" Moskva futbol maktabidan tushgan taklifga etibor qaratmaydi. 1971 yil "Paxtakor" murabbiyi Vyacheslav Solovyov uni "Paxtakor" o'rinbosarlari safiga taklif etadi. Asosiy tarkibga asta-sekinlik bilan jalb qilingan Bakanov o'zini yo'qotib qo'ymadi. Biroq og'ir jarohat tufayli u faoliyatida naqd 4 yillik tanaffus qilishga majbur bo'ldi. 1976 yil safga qaytgan Kostya murabbiy Anatoliy Bashashkinning ishonchini oqladi va birinchi ligada qatnashgan "Paxtakor" tarkibida 36 o'yinda 11 to'p kiritishga erishdi. 1977 yil u jamoa bilan birinchi ligada muvaffaqiyatli ishtirok etib, oliy ligaga chiqishga erishadi. Yuqori tabaqada ilk mavsumda 24 bahsda 7 gol uradi. Unga o'sha paytlar CSKAdan katta qiziqish bo'lgan, biroq Bakanov "Paxtakor"ni tark etishni xayoliga ham keltirmagan. Mashum fojia yuz bergan 1979 yil u 18 uchrashuvda maydonga tushgandi.
Bakanovlar oilasi futbolga moyilligi bilan ajralib turgan. Boris Bakanov uzoq yillar O'zbekiston va Qozog'iston klublarida to'p tepgan. Akasi bilan bog'liq halokatdan so'ng Boris futbolni tashlamoqchi bo'ladi, ammo onasi bunga ko'nmaydi. Konstantinning o'g'li Sergey Bakanov esa uzoq yillar "Traktor" jamoasi himoyachisi bo'lganini ko'pchilik muxlislar eslashadi. "Navbahor" va "Qizilqum" jamoalarida ham o'ynagan. Oliy ligada 15 mavsum o'tkazgan. Sergey imkon qadar otasining yo'lidan borishga intildi. O'zbekiston chempionatida hurmatga sazovor himoyachilardan biriga aylana oldi.
Konstantin Bakanov og'ir jarohatdan so'ng yana katta futbolga qaytgani, o'zi uchun sevimli klubda o'ynagani, unga sodiq qolgani bilan doim muxlislar qalbida qoladi.
Bosh sahifaga
1601