Anvar G'ofurov: Minskning iqlimiga gap bo'lishi mumkin emas

- Jamoada hammasi joyida. Futbolchilar bir-biri bilan ahil, barcha bir bo'lib o'yinimizni yanada yaxshilash, natija ko'rsatish uchun mehnat qilyapti. Murabbiylar shtabi tomonidan berilayotgan vazifalar, yuklamalar, ko'rsatmalarni bajarish biz futbolchilarga zavq bag'ishlayapti, desam to'g'ri bo'ladi. Buni o'yinchilarning yuz-ko'zidan, harakatlaridan bilish mumkin. Minskning iqlimiga gap bo'lishi mumkin emas!

Ikkinchi davraga tayyorgarlikni yurtimizda ham o'tkazishimiz mumkin edi, lekin issiq iqlimda yuklama olish bilan hozirgidek salqinda jismoniy kuchga ishlashning orasida farq bo'ladi. Issiqdagi yuklamalar ziyonimizga ham ishlashi mumkin. O'ylaymanki, mazkur yig'indagi yuklamalar ikkinchi davrada bizga foyda beradi.

Agar hozirgi holatimizda ikkinchi davraga kirib borsak, o'ylaymanki, ko'plab raqiblarimizga muammo bo'la olamiz va asabiga tegamiz. Minsk yig'ini davomida hozirgacha uchta o'rtoqlik uchrashuvi o'tkazdik. Aytish kerak, uchchala raqib ham kaminada ijobiy taassurot qoldirdi. To'g'ri, barcha o'yinlarda g'alaba qozonganimiz raqiblarni kuchsiz ko'rsatar, ammo men unday demagan bo'lardim. Sababi, bu bahslarda biz o'z o'yinimizni topa oldik. SHu bois to'p nazorati bo'yicha raqibdan ustunlik qildik. Nazarimda Belorus klublari paslarga asoslangan futbol o'ynamaydi, balki shuning uchun ular bizning o'yinga moslasha olmadi.