Tuman hokimligi tashabbusi bilan tuzilgan futbol klubi azolari chempionat va O'zbekiston kubogi doirasidagi uchrashuvlarni ko'tarinki ruhda o'tkazishni o'z oldiga maqsad qilib qo'yishgan. Hozirda jamoa murabbiylar shtabi asosiy etiborni futbolchilarning jismoniy tiklanishiga qaratishgan. SHu bois kuniga ikki mahalda mashg'ulotlar o'tkazilmoqda. Unda yigirma besh nafar futbolchi ishtirok etyapti.
Kuni kecha “Yashnobod” futbol jamoasi murabbiylari va futbolchilari Oqtoshdagi Yashnobod tumanidagi 30-Mehribonlik uyiga qarashli “Nur” dala hovlisiga tashrif buyurdi. Mazkur so'lim va bahavo maskanda ayni paytda 105 nafar o'g'il-qiz hordiq chiqarmoqda.
“Yashnobod” futbol klubi azolarini Feruza Usmonxo'jaeva rahbarligidagi 30-Mehribonlik uyi tarbiyachilari hamda o'g'il-qizlar kutib olishdi.
Samimiy va do'stona ruhda kechgan muloqotda “Yashnobod” futbol klubi rahbariyati va futbolchilari o'z faoliyatlari, kelgusi rejalari haqida tarbiyalanuvchilar bilan o'rtoqlashdilar.
Tadbir bahonasida “V” PRO liga va O'zbekiston kubogi 1/8 final bosqichi ishtirokchisi “Yashnobod” futbolchilari hamda Mehribonlik uyi tarbiyalanuvchilari o'rtasida mini futbol bo'yicha o'rtoqlik o'yini uyushtirildi. Uchrashuvning asosiy vaqtida 9:9 hisobi qayd etildi. Natijada g'olib nomi penaltilar seriyasi orqali aniqlandi. Unda omad mezbonlarga kulib boqdi — 9:8.
— “Yashnobod” jamoasi va ularning chempionatdagi ishtiroki haqida eshitganmiz, ularning O'zbekiston kubogi uchrashuvida super liganing “Dinamo” futbolchilarini mag'lubiyatga uchratganini televizor orqali ko'rib juda quvongandik, — deydi tarbiyalanuvchilardan biri Vladik. — Ammo ularning biz bilan bugungi uchrashuvini kutmagandik. Professional futbol klub vakillarining mehmonimiz bo'lgani bizni rosa xursand qildi. Ularga qarshi o'tgan o'yinda gol ham kiritganim menga o'zgacha zavq bag'ishladi. “Yashnobod” futbolchilarining qimmatli vaqtlarini ayamasdan oromgohimizga tashrif buyurishgani uchun katta rahmat! Biz do'stlarimiz bilan birgalikda ularga albatta muxlislik qilishda davom etamiz va “Yashnobod”ga omad tilaymiz.
O'rtoqlik uchrashuvidan so'ng, jamoalar birgalikda do'stona esdalik uchun suratlarga tushishdi. Bolajonlar uchun ozgina bo'lsa-da xushkayfiyat ulashgan yashnobodliklar o'zlari uchun yangi muxlislar topganidan xursand holda oromgohni tark etdilar.
Bosh sahifaga
1351