“Andijon” lageridan daraklar

Jamoa azolari bungacha “Admiral” mehmonxonasida istiqomat qilib kelayotgandi. Bugun tushlikdan so'ng klubimizning vaqtinchalik qarorgohi o'zgardi. Ayni damda “Andijon” FK azolari “Oq-tepa” klubi qarorgohida istiqomat qilmoqda. Barcha sharoitlarga ega bo'lgan ushbu baza jamoamiz uchun har tomonlama qulay bo'lishi turgan gap. Mashg'ulotlar ham endi "Oq-tepa" stadionida o'tadi. 

Bugun jamoamiz safida etiborga molik o'zgarishlar yuz berdi. Bir necha yillardan buyon “Andijon” sharafin himoya qilib kelayotgan Asror Rahmonov bilan do'stona ravishda xayrlashdik. Uning kelgusi faoliyatiga jamoamiz nomidan omad tilab qolamiz. Tarkibga esa avval xabar berganimizdek, Robbim Hasanov kelib qo'shildi. So'nggi ikki yilni “Navbahor”da o'tkazgan markaziy yarim himoyachi joriy mavsumni “Andijon”da o'tkazishi aniq bo'ldi. Bundan tashqari yaqinda “Olmaliq” bilan xayrlashgan Azamat Isroilov ham jamoa mashg'ulotlariga qo'shildi. Mavsumlar oralig'ida malum muddat “Buxoro” yig'inida bo'lgan taniqli himoyachi Sahob Jo'raev ham bugundan jamoamiz safiga qo'shildi. Hozircha ushbu futbolchilarning jamoamiz safida qolishi malum emas. Agarda har ikki tomon o'zaro kelishuvga erishsa, katta extimol bilan Isroilov va Jo'raev ham bu yil “Andijon”da o'ynaydi. 

Darvoqe, ertaga jamoamiz ikkita nazorat uchrashuvida maydonga tushadi. Rejaga ko'ra soat 11:00da “Bunyodkor” akademiyasiga qarashli mashg'ulot maydonida “Buxoro” bilan kuch sinashiladi. Tushlikdan so'ng esa yani, soat 14:30da “Oq-tepa”ga qarshi ham nazorat uchrashuvi o'tkaziladi. Bundan ko'zlangan maqsad murabbiylar ayni damda yig'inda bo'lib turgan har bir futbolchiga ko'proq o'ynash imkoniyatini berib, ularni yana bir bor ko'zdan kechirishdir. 

“Andijon” FK matbuot xizmati.