- Bugun tomoshabopligi bo'yicha ham, shiddat borasida ham yaxshi o'yin bo'ldi, deya olaman. Afsuski, mag'lub bo'lib, turnirni tark etdik. To'g'ri, bugun zich taqvim grafigi sababli, bir qator futbolchilarga dam olish imkonini bergandik, ammo shunga qaramay, yigitlar yomon o'yin namoyish etishmadi. Ikkinchi bo'limda gol o'tkazib yuborgan bo'lsak-da, jamoam kurashdan chetda qolmadi va oxirigacha jang qildi, deyish mumkin. Nima ham derdim, “Dinamo”ni yarim finalga chiqqani bilan tabriklayman va keyingi hal qiluvchi o'yinlarda omad tilab qolaman.
Raqib jamoa haqida? “Dinamo” jamoasi tarkibidagi nomlar bilan etiborga tushmasa-da, kurashuvchanligi, o'yinida murabbiyning imzosi borligi bilan ham hurmatga sazovor jamoadir. Jamoa har qanday raqib bilan maydonda qo'rqmay, kurasha oladi. Tarkibida yorqin nomlar yo'q, ammo jamoa bor, deyish mumkin.
“Andijon” o'yini mening qo'l ostimda ijobiy tomonga o'zgarayotgani haqida eshitish yoqimli bo'lsa-da, o'z fikrimni bildiradigan bo'lsam, men o'z jamoamning o'yini yanada yaxshilanishini kutayapman va buning uchun hali ko'p ishlashimizga to'g'ri keladi. Men hali jamoam o'yinida katta o'zgarishlar ko'rayotganim yo'q. Biz o'yindan-o'yinga kuchayib borishimiz shart.
CHindanam, yakshanba kuni “Navbahor”ga qarshi “Andijon”ni juda ham muhim bahs kutib turibdi. “Vodiy derbisi” doim shiddatli o'tishi barchaga malum. Tarkibda rotaciya bo'lishi aniq. Sababi biz ko'p futbolchilarimizga dam berdik, ular “Navbahor”ga qarshi o'yinda yangicha ishtiyoq bilan maydonga tushishlarini kutayapman. O'ylaymanki, “Vodiy derbisi”da “Navbahor” favorit sanaladi. “Andijon” esa muxlislari qarshisida bor kuch va imkoniyatini ishga soladi. Ikki jamoani ham oson bo'lmagan o'yin kutayapti.
Usmon Ibodov yozib oldi.
Bosh sahifaga
579