Turnir jadvalining 13-pog'onasida borayotgan "Buxoro" 5-o'ringa ko'tarilib olgan "So'g'diyona" bilan bahs olib boradi. SHuni aytish kerak, "Buxoro" ikkinchi davrada hali g'alaba nashidasini surgani yo'q. Jamoa ikki bor mag'lubiyatga uchrab, bir marta durang qayd etdi.
"So'g'diyona" esa aksincha, xuddi "Paxtakor" kabi ketma-ket uchta g'alabaga erishdi. Jizzaxliklar avvaliga "Lokomotiv"ni 1:0, undan keyin mehmonda "Qo'qon-1912"ni 2:1 va uyda "Qizilqum"ni 1:0 hisobida mag'lub etishdi.
"Buxoro" uydagi o'yinlarda ochko yig'ish bo'yicha ham quyida boryapti. Jamoa atigi bitta bahsda zafar quchgan va bu g'alaba birinchi davraning oxirgi turida "Andijon" (1:0) ustidan qo'lga kiritilgan. Bundan tashqari "Buxoro" uydagi uchrashuvlarda eng kam gol urgan jamoa bo'lib turibdi. To'plar nisbati 4-11.
Bugungi qarama-qarshilikning yana bir etiborga molik jihati Ulug'bek Baqoev "So'g'diyona" bosh murabbiyi sifatida sobiq jamoasiga qarshi bahs olib boradi. Bu ham o'yinga bo'lgan qiziqishni oshirishi shubhasiz. "So'g'diyona" shu paytgacha safar o'yinlarida ikki bor zafar quchgan. Jamoa Qo'qonda g'alaba qozonganini yuqorida aytib o'tdik. Yana bir g'alaba Olmaliqda AGMK ustidan qo'lga kiritilgan.
Bugun "Buxoro" g'alaba uchun bor kuchini ishga solishi shubhasiz. Yo'qsa Muhsin Muhammadiev jamoasi xavfli zonada qolib ketadi. O'z navbatida "So'g'diyona" ikkinchi davradagi qatorasiga uch g'alaba tasodif emasligini isbotlashga harakat qiladi.
Coca Cola Superligasi. 17-tur. 17 avgust
«Buxoro» - «So'g'diyona»
Hakamlar: Hasan Ro'ziev, Olimjon Abduvosilov, Rishat No'monov, Komil Rasulov.
Nazoratchi: Arslon Hotamov
Komissar: Jahongir Rahmatullaev
Boshlanish vaqti 19:15.
Bosh sahifaga
2134