Turni hujumkor va qiziqarli o'tishi kutilayotgan bellashuv tugatib beradi.
O'tgan mavsum top-6 jamoalarning kushandasi bo'lgan "Vulverxempton" o'z maydonida "Manchester Yunayted"ni qabul qiladi.
 Wolverhampton Wanderers | Premier League . 2-tur 20/08/2019, 00:00 - : - Boshlanmadi |  Manchester United |
Stadion: Molineux Stadium
Bosh hakam: Jon Moss
"Bo'rilar" mavsumni "Lester" maydonidagi 0:0 hisobi bilan boshlashdi. Nunu Eshpiritu shogirdlari Evropa ligasi saralash bosqichi doirasida 4ta o'yin o'tkazishdi va to'rtta g'alabani qo'lga kiritishdi. Umumiy hisobda o'tkazilgan beshta rasmiy o'yindan to'rttasida jamoa o'z darvozasi daxlsizligini saqlab qoldi. Jamoa uyda ancha ishonchli o'yin namoyish etadi. Markazda Nevesh, Moutino va Dendonker uchligi nazoratni ushlab turishga harakat qiladi. Hujumda esa ayni paytda yaxshi formada bo'lgan Raul Ximenes va Diogo Jotalar o'tgan yilgi ishlarini takrorlashga urinishadi. Ularning har ikkisi MYUga qarshi bir yil oldingi o'yinlarda gol urgan.
"Manchester Yunayted" chempionatni "CHelsi" ustidan qozonilgan ishonchli g'alaba (4:0) bilan boshladi. O'sha uchrashuvda garchi Sulsher shogirdlari birinchi bo'limda mazmunli o'yin ko'rsata olishmagan bo'lsa-da, keyinchalik vaziyatni o'zgartirishdi. Ayni paytda jamoa muqim himoyaga ega bo'ldi. Yani, SHou, Maguayr, Lindelyof, Van-Bissaka to'rtligi "Qizil iblislar"ning asosiy himoyachilari bo'lishadi. Ole joriy mavsum 4-2-3-1 taktik sxemasidan foydalanmoqda. Mavsumoldi o'yinlarda ham jamoa asosan shu sxemada to'p tepdi. Norvegiyalik mutaxassis 4-3-3dan voz kechgan ko'rinadi. Balki, zarurat tug'ilganda foydalanar, lekin endilikda Sulsher uchun birlamchi sxema - 4-2-3-1. MYU hujum zonasida harakatlanayot futbolchilar o'zaro joy almashib o'ynashmoqda. Reshford va Marsyal hujum markazi va chap qanotda almashib o'ynayapti. Bazan eng oldinda Lingard ham paydo bo'lmoqda. Hujumdagi o'yinchilarning joy almashib harakatlanayotgani ham raqib himoyachilariga qiyinchilik tug'diradi. Matich soppa-sog' bo'lmagan paytda Maktominey o'zini yaxshi ko'rsatdi va nima uchun jamoa tayanch zona va markazga yangi futbolchi sotib olmaganini javob bergandek go'yo.
Bilasizmi?
- "Vulverxempton" APL doirasida oxirgi 8ta uy uchrashuvida mag'lub bo'lmagan;
- "Bo'rilar" o'tgan mavsum MYUga qarshi barcha musobaqalarda 3 bor maydonga tushishgan va umuman yutqazishmagan (2 g'alaba, 1 durang);
- "Manchester Yunayted" Premer-liga klublari orasida dushanba kungi o'yinlarda eng ko'p bor g'alaba qozongan - 63 o'yinda 43 g'alaba. 68% - klublar uchun haftaning aniq bir kunida g'olib chiqish bo'yicha eng yuqori ko'rsatkich;
- Antoni Marsyal MYU uchun barcha turnirlarda 49ta gol urgan. U "Yunayted" uchun 50ta gol urgan 53-futbolchiga aylanishi mumkin.
Jarohatlar
"Vulverxempton" - yo'q.
"Manchester Yunayted" - Erik Bayi, Timoti Fosu-Mensa, Fred, Aleksis Sanches.
Taxminiy tarkiblar
"Vulverxempton" (3-5-2): Rui Patrisiu - Xonni, Rayan Bennet, Konor Koadi, Uilli Boli, Mett Doerti - Liander Dendonker, Joau Moutino, Ruben Nevesh - Diogo Jota, Raul Ximenes.
"Manchester Yunayted" (4-2-3-1): David De Xea - Lyuk SHou, Garri Maguayr, Viktor Lindelyof, Aaron Van-Bissaka - Skott Maktominey, Pol Pogba - Jessi Lingard, Andreas Pereyra, Antoni Marsyal - Markus Reshford.
Murabbiylar fikrlari
Ole-Gunnar Sulsher: "Vulverxempton" - chuqur himoyalanadigan va ko'p bo'sh zona bermaydigan qiyin jamoa. Ular qarshi hujumni yaxshi uddalashadi, standart vaziyatlar xavf tug'diradi. O'tgan mavsumdagi o'yinlarimizni o'rganib chiqdik. Bu safar bizning sport formamiz, o'yinga yondashuvimiz yuqori darajada. Birinchi turdagi g'alabadan keyin kayfiyatimiz ham alo. SHu sabab, bu o'yinga ishonch bilan tashrif buyurdik".
Nunu Eshpiritu Santu: "Bu boshqacha o'yin. So'zsiz, o'tgan mavsumdagilardan farq qiladigan to'qnashuv bo'ladi. Barcha chiziqlarida fantastik o'yinchilari bor kuchli raqib bilan to'qnash kelayotganimizni bilamiz. Biz raqobatbardosh bo'lishni va o'ynashni xohlaymiz".
Bosh sahifaga
1967