“Lokomotiv” ko'rigida ruminiyalik Florin Kostya

To'liq ism-sharifi Florin Konstantin Kostya bo'lgan hujumchi 1985 yil Ruminiyaning Dregeshani shahrida tug'ilgan. Faoliyatining asosiy qismini Ruminiya chempionatida o'tkazgan Kostya umumiy hisobda 70 ta gol urishga muvaffaq bo'lgan. Ruminiya terma jamoasi safida 6 ta bellashuvda maydonga tushgan.

“Lokomotiv” safida horijlik 1 ta himoyachi va 1 ta yarim himoyachi bor. Serbiyalik Nemanya Yanichich hamda gruziyalik Kaxi Maxaradze 2016 yilgi mavsumni “temiryo'lchilar” safida o'tkazishadi. “Lokomotiv” shuningdek yana bir nafar legioner bilan shartnoma imzolashi mumkin. Bu borada asosan hujum chizig'i vakillari ko'rikdan o'tishmoqda. Florin Kostyaga qadar CHernogoriya hamda Serbiya mamlakatlaridan tashrif buyurgan hujumchilar klub lagerida bo'lib qaytishgan, ammo ularning harakatlari maqul kelmagandi.

Florin Kostya futbol muxlislarimiz uchun nomi tanish bo'lgan “Universitatya”, “Styaua”, “CHFR”, shuningdek, Tulaning “Arsenal” klublari safida o'ynagan. Texnikasi yuqori bo'lgan Kostya hozir 30 yoshda. Undan talab qilinadigani “Lokomotiv” hujum chizig'ida to'p surayotgan o'zbekistonlik futbolchilardan ustun ekanligini qisqa vaqt davomida ko'rsata olish. Legioner buning uddasidan chiqa olmasa, unga javob berib yuboriladi.

Toshkent vaqti bilan 12:00 da Florin Kostya “temiryo'lchilar” libosidagi birinchi mashg'ulotini o'tkazadi. 19:00 da esa katta ehtimol bilan Xitoyning “CHanchun Yatay” klubiga qarshi o'rtoqlik o'yinida maydonga tushadi. Qayd etish kerak, mazkur bellashuvda “Lokomotiv”ning milliy terma jamoaga nomzod olti nafar futbolchisi ishtirok etmaydi.