O'zbekiston terma jamoasi qura jarayonida ikkinchi savatchadan joy olgani bois bu turda dam oladi. Lekin ertaga birinchi savatchadagi jamoalar o'z yurishini boshlaydi. Aytish mumkinki, mana endi kurashga jahon chempionatiga borish uchun haqiqiy davogarlar qo'shiladi.
Guruhimizdagi eng kuchli raqib Saudiya Arabistoni ertaga safarda Yaman mehmoni bo'ladi. Yamanda siyosiy notinch vaziyat tufayli uchrashuv Bahraynda tashkil etiladi va bizning vaqt bilan 17:00da boshlanadi. Yaman 1-turda Singapur bilan durang o'ynadi.
Ertangi o'yin franciyalik murabbiy Erve Renar uchun debyut hisoblanadi. CHunki ushbu mutaxassis Saudiya Arabistoni bosh murabbiyi sifatida ilk rasmiy uchrashuvini o'tkazadi.
Ertaga shuningdek, Singapur - Falastin bellashuvi ham bo'lib o'tadi. Singapur ketma-ket ikkinchi bor o'z maydonida o'ynaydi. Bu jamoalar o'yini 16:45da start oladi. Falastin bosh murabbiyi Nuriddin Ould Ali shunday dedi: "O'zbekiston ustidan qozonilgan g'alabani unutib, bor etiborni navbatdagi bahsga qaratishimiz kerak. Futbolda o'tmishdagi yutuqlar bilan yashash kerak emas. Men bu haqda futbolchilarga ham aytdim".
Demak, ertaga garchi milliy terma jamoamiz o'yin o'tkazmasa-da, guruhdagi vaziyatni bilish uchun ikkita o'yinni diqqat bilan kuzatib boramiz.
Bosh sahifaga
264