Ro'ziqul Berdiev: "Ertaga kim ruhan kuchli bo'lsa o'sha yutadi"

"Ertangi o'yinga futbolchilarni ham ruhan, ham jismonan yaxshi tayyorladik. O'zbekiston superkubogida birinchi marotaba o'ynamoqdamiz. Ushbu kichik trofey jamoamiz uchun muhim. CHunki ushbu svorinni qo'lga kiritgan jamoa butun mavsum davomida yaxshi kayfiyatda bo'ladi. Biz ertanga o'yinga shunchaki OCHLga tayyorgarlik sifatida qaramayapmiz. Hozir bor diqqat-etiborimizni superkubokka qaratilgan. Bu biz uchun juda muhim. "Paxtakor" har qanday holatda ham kuchsizlanib qolmaydi. Ular tarkibida mahoratli va istedodli futbolchilar ko'p. Biz ham o'z o'rnida yoshlarga imkoniyat qaratamiz. Tarkibimizda 1997-1998 yilda tug'ilgan bir qancha iqtidor sohiblari bor", - dedi Ro'ziqul Berdiev.

- "Paxtakor" "Nasaf"ga qarshi alohida tayyorgarlik ko'rganini aytdi. Sizlar ham ularni yaxshilab o'rganib chiqdinglarmi?

- Ha albatta. Biz ham ularni juda sinchiklab o'rganib chiqdik.

- "Paxtakor" haqida nima deya olasiz? Ularni bir qator etakchi futbolchilar tark etishdi...

- Biz ayni paytda "Paxtakor" bilan bir xil holatdamiz. Bu holat esa superkubok oldidan jamoalar imkoniyatlarini tenglashtiradi. Ertaga kim ruhiy tomonlama yaxshi tayyor bo'lsa o'sha g'alaba qozonadi deb o'ylayman.

- "Nasaf"da hujumchi muammosi borligini o'zingiz ham juda ko'p takidlab keldingiz. Ammo yangi mavsum oldidan yangi hujumchi tarkibga jalb etilgani yo'q. Buni qanday izohlaysiz?

- Biz o'zimizga kerakli bo'lgan futbolchilarga qulay takliflar bilan chiqqandik.  Biroq ular tarkibimizga kelib qo'shilishni istashmadi. Biz istagan kuchli legioner hujumchini olishga sharoitimiz yo'l qo'ymaydi. Yangi mavsum oldidan faqat chempionat uchun yangi hujumchi qo'shib olishimiz mumkin. OCHL uchun zayavka muddati yakunladi. Klub homiysi jamoamizni tashlab qo'ygani yo'q. Ammo bizni erkalatib ham qo'yishmayapti. Qo'l ostimizdagi mavjud futbolchilar bilan yaxshi natijalarga erishishga harakat qilamiz.

- Artur Gevorkyan: Jamoamiz safiga yoshlar jamoamizdan kelib qo'shilgan futbolchilarning barchasi katta iqtidor sohiblari. Ular mashg'ulotlarda juda katta kuch va ishtiyoq bilan shug'ullanishmoqda. O'ylaymanki, tez orada bu futbolchilar yuqori darajaga chiqishadi. Albatta o'z ustilarida tinmay ishlashlari zarur. Biz ertaga muxlislarimizga g'alaba va yangi sovrinni taqdim etishni istaymiz. Maqsadimiz mavsumni sovrin bilan boshlash.