"Cementchi"da nima gap?

Jamoa matbuot xizmatining malumot berishicha, tarkibda etiborga molik o'zgarishlar bor. Bungacha yig'inda ishtirok etib kelgan qoraqalpog'istonlik Erlbol Seytnazarov yakunda jamoa bilan xayrlashishga qaror qildi. U oilaviy muammosi tufayli bu yil vodiyda o'ynamaydigan bo'ldi. Seytnazarov bilan birga "Cementchi" yig'iniga kelgan yana bir qoraqalpoq o'g'loni Nurlibek Talasboev esa jamoada qoladigan bo'ldi.

Jamoaning to'purar hujumchisi Elyor Akbarov esa ayni damda o'zini oliy liga vakili "Qizilqum" yig'inida ishtirok etmoqda. Bundan tashqari darvozabon Farrux Turdaliev ham jamoa bilan xayrlashdi. Uning o'rniga yana Eldor Isaboev qaytib kelgan. Ushbu hafta quvasoyliklar ikkita nazorat uchrashuvida maydonga tushadi. Rejaga ko'ra ertaga Farg'onada "Bolalar va o'smirlar futbol maktabi" jamoasiga qarshi maydonga chiqadi. 20 fevral kuni esa Quvasoyda "UzDongJu"ga qarshi bahs olib boradi.