Endi matbuot xizmati nafaqat Oliy ligadagi ishtiroklarni, balki, chempionatimizga endi asos solinganidan buyon “Navro'z” (“Andijon”) jamoasi tarkibida o'ynagan futbolchilar bilan intervyu uyushtirishni ham o'z rejamizga kiritdi.
Bugungi “mehmonimiz” chap qanot himoyasida ajoyib harakatlari bilan muxlislar etiborini qozongan, to'p uchun kurashlarda qo'rqmay kurashgan, sochlarini elkasigacha o'stirib olib maydonda harakat qilgan Ismoil Malikov!
Ismoil Malikov
F.I.O: Ismoil Maxammadjonovich Malikov
Tug'ilgan yili: 19.01.1973 yil.
Tug'ilgan joyi: Qirg'iziston Respublikasi.
Ampluasi: Himoyachi.
“Andijon” (o'sha paytda jamoa nomi “Navro'z” deb atalar edi) jamoasi tarkibida 1991 yilgi mavsumda 47 ta uchrashuvda maydonga tushib, raqiblar darvozasini 8 marotaba ishg'ol etishga muvaffaq bo'lgan.
1992 yilgi mavsumda 27 ta o'yin, 3 ta gol;
1993 yilgi mavsumda 28 ta o'yin, 5 ta gol;
1994 yilgi mavsumda 27 ta o'yin, 2 ta gol;
1995 yilgi mavsumda 4 ta o'yin, gol yo'q;
1997 yilgi mavsumda 4 ta o'yin, gol yo'q.
Ismoil Malikov “Andijon” jamoasidan tashqari Qirg'iztonning “Spartak” (Tokmak), “Semetey” (O'sh), “Jashtik Oq Oltin” (Qorasuv) va “Dinamo Oloy” (O'sh) jamoalarida o'ynagan.
- Assalomu aleykum, Ismoil aka! Andijonlik muxlislar Sizni unutishgani yo'q.
- Va aleykum assalom. Men ham Andijonni, andijonlik muxlislarni unutganim yo'q, unutmayman ham!
- Faoliyatingizni qachon yakunladingiz?
- Futbolchilik faoliyatimni 2010 yili “Jashtik Oq Oltin” jamoasida o'ynovchi murabbiy sifatida yakunladim. Aniqroq qilib aytganda, yakunlashga majbur bo'ldim. Sababi, O'shdagi voqealar sababli, faoliyatimni yakunlab, Rossiyaga ketdim.
- Rossiyada nima ishlar bilan shug'ullanmoqdasiz?
- Rossiyada nima ish qilishim mumkin? 2010 yili Rossiyaning Murmansk shahriga kelganman. Kelgan paytlarimda Rossiya fuqaroligi yo'qligi uchun katta ombor bor edi, o'sha erda ishlab turdim. Tasodifni qarangki, men ishlayotgan omborning rahbarlari futbolni sevisharkan. SHundan so'ng, turli xil turnirlarda ishtirok etdik. SHu yildan etiboran Rossiyaning Sankt-Peterburg shahriga keldim va bolalar murabbiyi bo'lib ishlashni boshladim. “Nevskiy front” futbol maktabida faoliyat yurityapman. Ushbu futbol maktabi “Zenit” klubiga tegishli.
Evropa Ligasi doirasi bo'lib o'tgan "Zenit"-"Bordo" uchrashuvida
- Andijon haqidagi xotiralaringizni eslab turasizmi?
- Albatta! Andijon mening ikkinchi Vatanim hisoblanadi. Men u erda sport internetda tahsil oldim, futbolga ilk qadamimni qo'yib, 1989 yili Qo'rg'ontepaning “Savay” klubida o'ynashni boshladim. SHu sababli, Andijonni umuman unutmayman. 1993 yil esa umuman unutilmas yil bo'lib qoladi. Sababi, jamoamiz juda kuchli edi, Jukovskiy murabbiy edi. Mamatkazin eng katta o'yinchimiz hisoblanardi. Jamoaning ichki muhiti esa shunchaki super edi.
- O'sha davrdagi jamoadoshlaringiz bilan aloqa bo'lib turasizmi?
- Albatta. Juda ko'plab jamoadoshlarim bilan aloqani uzmaganmiz. Masalan, 1993 yili darvozamizni qo'riqlagan Vladislav Frank bilan doim aloqadamiz. Hozirgi kunda u Yangi Zelandiyada istiqomat qilmoqda. Adashmasam, Frank faoliyatini yaqinda yakunladi. Avvaliga u Germaniyaga ketgandi, keyinchalik Yangi Zelandiyaga o'tdi.
- O'sha paytdagi tarkibni eslay olasizmi?
- Keling 1993 yilni eslab ko'ramiz. Darvozaga Vladislav Frank edi. Himoya markazida Andrey SHipilov va Fazliddin SHoyimqulovlar o'ynashardi. O'ng qanot himoyada Mamatkazin, chap qanotda esa men o'ynardim. Gohida Mamatkazin bilan o'rnimizni almashtirib ham o'ynardik. Qanot yarim himoyasida Farhod Qodirov va Rustam Sobirov o'ynardi. Maydon markazida kim o'ynardi? (Uzoq o'ylanib) markaziy yarim himoyachilarni eslay olmadim. Hujumda Otabek Qilichev zahiradan maydonga tushardi. Karen Safarov asosiy tarkibda o'ynardi. SHuningdek, Bahodir Karimov ham asosiyda o'ynardi. Rustam Abdiev o'ynardi.
- O'sha yillarda Sizga qarshi o'ynagan hujumchilarning eng kuchlisi deb qaysi birini ko'rsatgan bo'lardingiz?
- Ular ko'pchilikni tashkil qilishardi. 1993 yillari Oleg SHackix hujumchilarning qiroli edi. Igor SHkviringa qarshi o'ynash ham juda qiyin edi. “Navbahor” tarkibida Rustam Zabirov bor edi. Asad aka Do'rmonov bor edi “Neftchi” tarkibida. Ravshan Bozorovni ham alohida ko'rsatgan bo'lardim. O'sha paytlarda hujumchilar kuchli bo'lgan. O'sha paytlar futbol saviyasi juda yuqori edi hozirgiga qaraganda. Biz katta pul olmas edik, biz futbol o'ynar edik. Avval futbol o'ynardik, keyin pul so'rardik. Hozir esa aksincha bo'lib qolgan. Men O'zbekiston futbolini muntazam kuzatib boraman. Hozirgi kunda hali hech qanday karomat ko'rsatmasdan turib katta-katta ko'tarma pullar so'rashadi. Biz ko'tarma puli so'ragani uyalardik. Hali chempionat boshlanmasdan turib, hali biror yorqin o'yin namoyish etmasdan turib ko'tarma puli talab qilishni hech bir futbolchi hazm qila olmas edi u yillarda.
- Farzandlaringiz futbol bilan shug'ullanadimi?
- Yo'q! Farzandlarim futbol bilan shug'ullanmaydi. Birinchi oilamdan o'g'lim bor. U ham Rossiyada. Irkutsk shahrida tadbirkorlik bilan shug'ullanadi. Ikkinchi oilamdan esa qizim bor. Qizim men bilan Piterda istiqomat qiladi, nabiramni tarbiyasi bilan shug'ullanadi.
(SHu orada Ismoil Malikovga hozirgi kunda “Andijon” futbol klubida darvozabonlar murabbiyi lavozimida ishlab kelayotgan Qobil Olimjonovni rasmini yubordim va “Esladingizmi” degan savolni berdim)
- Buni qanday tanimay bo'ladi? Qobil Olimjonov-ku! U endi futbolchilik faoliyatini boshlaganida “SHahrixon”da birga o'ynaganmiz. U paytda ancha yosh bo'lgan edi. Qobil Olimjonov bilan oxirgi marotaba 2007 yili Qorasuv shahrida ko'rishgandim. O'shanda u “Jalolobod” jamoasida bizga qarshi o'ynagandi.
- Andijonlik futbol muxlislari va Andijon halqiga tilaklaringiz...
- Andijonlik barcha meni tanigan futbol muxlislariga alangali salomimni yo'llayman! Andijon halqiga esa tinchlik-omonlikni tilab qolaman! Andijonlik muxlislarni va Andijonni sog'indim...!
Keyingi "mehmonimiz" qisqa muddat ichida andijonlik muxlislarning yoqimtoyiga aylanib ulgurgan Sergey Dub bo'ladi. Bizni kuzatishda davom eting!
“Andijon” futbol klubi matbuot xizmati
Bosh sahifaga
1187