"Lokomotiv" PFK Rossiyaning Ekaterinburg shahrida bo'lib o'tayotgan boks bo'yicha jahon chempionatida qatnashgan O'zbekiston terma jamoasining umumjamoa hisobida birinchi o'rinni qo'lga kiritgani bilan tabriklaydi.
Bugun to'rt nafar bokschimiz ringga ko'tarilib, uchta oltin medal va bitta kumush medalni qo'lga kiritishdi. Dastlab SHahobiddin Zoirov oltin medallar shodasini boshlab berdi. U finalda hindistonlik raqibini mag'lub etdi. Undan keyin Mirazizbek Mirzaxalilov kubalik bokschini mag'lub etib ikkinchi oltin medalni yurtimizga taqdim qildi.
Afsuski, Dilshod Ro'zmetovdan finalda biroz omad yuz o'girdi va u qozog'istonlik raqibiga ochkolar hisobiga ko'ra imkoniyatni boy berib qo'ydi. Og'ir vazndagi sportchimiz Bahodir Jalolov esa finalda qozog'istonlik bokschini engib uchinchi oltin medalni taqdim etdi.
Ikki yil avval Germaniyaning Gamburg shahrida tashkil etilgan boks bo'yicha jahon chempionatida O'zbekiston terma jamoasi umumjamoa hisobida ikkinchi bo'lgandi, bu safar omad to'liq biz tomonda bo'lib birinchi o'rinni qo'lga kiritdik. Bu borada Rossiya ikkinchi va Qozog'iston uchinchi bo'ldi.
SHunday ekan, qo'lga kiritilgan ushbu ajoyib yutuq bilan bokschilarimizni va O'zbekiston boks federaciyasi rahbariyatini "Lokomotiv" PFK rahbariyati, murabbiylar shtabi, futbolchilar, ishchi-xodimlar hamda jamoamiz muxlislari nomidan muborakbod etib qolamiz. Yurtimiz bayrog'i xalqaro arenalarda baland hilpirashda davom etaversin.
Bosh sahifaga
185