Turnir jadvalida 11-o'rinni egallab turgan AGMK o'z maydonida Qarshining "Nasaf" klubini qabul qiladi. "Nasaf" hozirda 28 ochko bilan 6-o'rinda boryapti. AGMK hisobida esa 19 ochko mavjud.
Bugun Olmaliqda o'ziga yarasha qiziq bellashuv kechishi kutilyapti. Negaki o'tgan turda ikkala jamoa ham mag'lubiyatga uchradi. SHu bois bugun tomonlar uch ochko uchun harakat qilishadi. AGMK avvalgi tur "Surxon" mehmoni bo'lib 0:1 hisobida yutqazib qaytgan bo'lsa, "Nasaf" o'z maydonida "Buxoro"ga imkoniyatni boy berib qo'ydi.
Tabiiyki "Nasaf"ning mag'lubiyati kutilmagan bo'ldi, ammo buxoroliklar ikkita chiroyli gol urganini ham unutmaslik kerak. Umuman olganda hozirgi AGMK bilan "Nasaf"ga tushunib bo'lmayapti. CHunki ikkala jamoa ham barqaror o'yin ko'rsata olmayapti. Masalan, AGMK ikkinchi davra boshlanganidan beri faqat ikkita bellashuvda g'alaba qozondi.
Olmaliqliklar safarda "Navbahor"ni mag'lub etib qaytgach, ketma-ket ikkita mag'lubiyatni qabul qilib olishdi. SHundan keyin jamoa o'z maydonida "Dinamo" ustidan zafar quchib o'tgan tur Termizda imkoniyatni boy berdi.
"Nasaf" ham ikkinchi davrada faqat ikki bor yutuqqa erishdi. Ro'ziqul Berdiev shogirdlari safarda "Surxon"ni va uyda "Bunyodkor"ni mag'lub etishgan. SHundan beri jamoa to'rtta o'yin o'tkazib, birortasini yuta olmadi. "Nasaf" oxirgi 4 uchrashuvning uchtasida mag'lub bo'lib, bir bor durang o'ynadi.
Olmaliqda kechgan oxirgi 5 uchrashuv
2018. Ikkinchi bosqich. AGMK - "Nasaf" 0:2
2018. Birinchi bosqich. AGMK - "Nasaf" 0:0
2017. AGMK - "Nasaf" 1:0
2016. AGMK - "Nasaf" 1:3
2015. AGMK - "Nasaf" 2:0
Olmaliqda bo'lib o'tgan oxirgi besh uchrashuvning ikkitasida maydon egalari zafar quchgan. Yana ikkita bahsda "Nasaf"ning qo'li baland kelgan va bir uchrashuv durang natija bilan yakun topgan. Bugungi bellashuvda esa imkoniyatlar teng baholanmoqda.
Bosh sahifaga
617