- Sizning ko'zingiz bilan qaraganda bahs qanday o'tdi?
- Vazifamizni o'zimiz qiyinlashtirib oldik. Birinchi bo'lim oxirida xotirjamlikka berilib, gol o'tkazganimizdan so'ng, ikkinchi taym boshida biroz qiynaldik. Xudoga shukur, g'alaba qozondik.
- Vadim Abramov Lutfulla To'raevni terma jamoaga chaqirganda bazi muxlis va jurnalistlar bu qaror borasida tanqidiy fikrlar bildirishdi. Uning navbatdagi kutilmagan qarori sizni Yamanga qarshi uchrashuvda asosiy tarkibda maydonga tushirish bo'ldi. Murabbiyning tavakkali tufayli qo'rquv yoki hayajon bo'ldimi?
- Qo'rquv bo'ldi deya olmayman, ammo hayajonlandim. Masuliyati katta bo'lgan bahsda Vadim Karlenovich menga ishonch bildirdi. Bu qaror meni hayron qoldirdi. Yamanga qarshi bahsda gol urganimdan so'ng hayajon ancha pasaydi va muxlislar qo'llab-quvvatlashi bilan o'zimga bo'lgan ishonch ortdi.
- O'yinlardan so'ng saytlarda "komment"larni o'qib turasizmi?
- Onda-sonda o'qib turaman. Bosh murabbiy Vadim Karlenovich izohlarni o'qimaslikni maslahat beradi. Uning aytishicha, bu "komment"larni futbolchiga salbiy tasir qilar ekan.
- O'zbekiston terma jamoasi va "Bunyodkor" uslubi o'xshashmi?
- Yo'q, o'xshash deya olmayman. Lekin futbolchilarga talab bir xil.
- Terma jamoa safida ikkita bahsda maydonga tushdingiz. O'z o'yiningizdan ko'nglingiz to'ldimi?
- Futbolchi hech qachon "eng zo'riman" yoki "yaxshi harakat qilyapman" deb to'xtab qolmasligi kerak. MTJ bahslarida xatolarga yo'l qo'ydim. Endi u xatolarni tahlil qilib, ular ustida ishlashim kerak.
- Terma jamoadan chaqiruv olganingizni kimdan bildingiz?
- OTJ safida O'zbekiston terma jamoasiga qarshi o'rtoqlik uchrashuvida maydonga tushgan edim. Ertasiga tushlikdan chiqqanimizdan so'ng menga O'FA (O'zbekiston futbol associaciyasi)dan qo'ng'iroq bo'ldi va meni MTJga taklif qilishib, "kiyimlaringni yig'ishtir" deyishdi.
Bosh sahifaga
331