Aytish mumkinki, navbatdagi tur ham o'ziga yarasha qiziq kechdi. Bir nechta o'yinda kutilmagan natijalar qayd etildi. Quyida 22-turning etiborga molik voqealari haqida so'z yuritamiz.
"Qo'qon-1912" - "Qizilqum" 1:2
- "Qizilqum" to'rt o'yindan iborat g'alabasiz seriyasiga chek qo'ydi. Safarda "Qo'qon-1912" bilan kechgan bahsda Hamidjon Aktamov shogirdlari 0:1 hisobida ortda borayotib yakunda 2:1 hisobida g'alaba qozonishdi. Bu "Qizilqum"ning safardagi ikkinchi g'alabasi bo'ldi.
- "Qo'qon-1912" qatorasiga ikkinchi bor uyda mag'lub bo'ldi. Bu jamoa avvalgi tur "Metallurg"ga ham imkoniyatni boy bergandi. Ketma-ket to'rtta uchrashuvni g'alaba bilan yakunlagan qo'qonliklarga oxirgi uch turdan beri omad kelmayapti.
"Metallurg" - "So'g'diyona" 0:1
- Uchinchi o'ringa harakat qilayotgan "So'g'diyona" Bekobodda qiyin uchrashuvni o'tkazdi. "Metallurg" bilan kechgan bahsda mehmonlar 1:0 hisobida zafar quchishdi. SHundan qilib "So'g'diyona"ning uchta o'yindan iborat g'alabasiz seriyasiga yakun yasaldi.
- "Metallurg" o'z maydonida ketma-ket ikkinchi mag'lubiyatni qabul qilib oldi. Andrey SHipilov shogirdlari o'tgan tur "Paxtakor"ga ham imkoniyatni boy berishgandi.
"Bunyodkor" - AGMK 0:2
- AGMK o'z tarixida ilk marta safarda "Bunyodkor"ni mag'lub etdi. Bu natijani qo'lga kiritish o'z vaqtida "Bunyodkor"ni boshqargan Mirjalol Qosimovga nasib etdi. AGMK oxirgi ikki turni g'alaba bilan bilan yakunladi.
- Negadir "Bunyodkor"ning hech omadi kelmayapti. Jamoa o'tgan tur "Buxoro"ni enga olmagandi, bu safar AGMKga gol urmasdan mag'lub bo'ldi. Kuchli uchlikka kirishga harakat qilayotgan "Bunyodkor"ning oxirgi 5ta o'yinda faqat bir bor zafar quchgani g'alati.
"Surxon" - "Navbahor" 0:0
- Termizdagi bahsda hisob ochilmadi. Bu "Navbahor"ning safardagi ketma-ket ikkinchi durangi bo'ldi. Qatorasiga uch o'yinda zafar quchgan "Surxon" oxirgi ikki turda mag'lubiyat va durang qayd etdi.
"Lokomotiv" - "Buxoro" 2:0
- Mana shu o'yinda Ignatiy Nesterov diskvalifikaciya muddatini yakunlab yana maydonga qaytdi. Uning qaytishi "Lokomotiv"ning qatorasiga 4ta o'yindan iborat durangli seriyasiga chek qo'ydi.
- Safarda "Nasaf"ni mag'lub etib, "Buyondkor" bilan durang o'ynagan "Buxoro"ning "Loko"ga "tishi o'tmadi". Bilasiz, hozir buxoroliklar Superligada qolish uchun harakat qilishmoqda. SHunday ekan, jamoaning har bir o'yini finalga teng bo'ladi.
"Dinamo" - "Paxtakor" 1:4
- "Paxtakor" hisobda ortda borayotib ham yirik hisobda g'alaba qozondi. Uchrashuvda Doston Hamdamov dublga erishdi. SHunday qilib "Paxtakor"ning ketma-ket g'alabalari soni 14taga etdi.
- "Dinamo" bosh murabbiyni o'zgartirgani bilan baribir yutqazishda davom etyapti. Bu jamoa qatorasiga 10 o'yindan beri faqat mag'lubiyatga uchrayapti. Jamoa so'nggi bor kimni mag'lub etganini futbolchilar ham eslay olmasa kerak.
"Nasaf" - "Andijon" 3:0
- Nihoyat "Nasaf" Andijondagi mag'lubiyat alamini oldi. Esingizda bo'lsa, "Nasaf" birinchi davra o'yinida 1:3 hisobida mag'lub bo'lgandi, ikkinchi davrada esa 3:0 hisobida zafar quchdi. Mazkur bellashuvda Xumoyun Murtazoev dublga erishdi. SHunday qilib "Andijon"ning ketma-ket ikki o'yindan iborat g'alabali seriyasi Qarshida to'xtadi.
Bosh sahifaga
1963