Futbolchi maydonga tushmay o'z jamoasi darvozasiga penalti olib keldi

Mezbonlar hisobni ochishdi, ammo birinchi bo'lim oxirida zaxiradagi futbolchining ahmoqona xatosi tufayli gol o'tkazib yuborishdi.

Nima?

Ha, to'g'ri o'qidingiz - aynan zaxira futbolchisi tufayli.

"Xolshtayn"ning 23 yoshli futbolchisi Mixael Ebervayn boshqa futbolchilar bilan o'z jamoasi darvozasi ortida chigalyozdi mashqlarni bajarayotgan edi. Bu vaqtda "Boxum" forvardi Silver Ganvula to'pni o'ziga to'g'irlab, jarima maydonchasiga kirdi va zarba berdi, ammo u kutilganidek bo'lmadi. To'p maydonni tark etayotgan bir paytda Ebervayn (zaxiradagi) uni chiziq ustida to'xtatib qoldi.

Uchrashuv bosh hakami Timo Gerax nima bo'lganini payqamadi, ammo ikkinchi Bundesligada VAR bor. Videoassistentlar vaziyatni qayta ko'rib chiqishdi va Ebervayn qoida buzganini malum qilishdi. Gerax videoni o'zi tomosha qildi va "Xolshtayn" darvozasiga penalti belgiladi.

Noaniq zarba sohibi Silver Ganvula penaltidan gol urishga muvaffaq bo'ldi.

"Qoida bo'yicha bu to'g'rimi?" deyapsizmi? Albatta, hakam haq edi. Qoidalarga ko'ra, agar "o'yin jamoaning almashtirilgan, chetlatilgan yoki zaxiradigi futbolchisi tufayli to'xtatilsa bahs jarima zarbasi yoki penalti orqali davom ettiriladi". Ebervayn to'pni o'z jarima maydonchasi ichida to'xtatdi, shu sababli 11 metrlik jarima zarbasi qo'yildi.

Mezbonlarning baxtiga jamoa bahsni 2:1 hisobida yakunladi. "Xolshtayn"da debyut qilishga ulgurmagan Ebervayn esa faoliyatini boshqa klubda davom ettirishi mumkin.