Tarixda birinchi marta mamlakatimizda 19 yoshgacha futbolchilar o'rtasida Osiyo chempionati bo'lib o'tadi. Esingizda bo'lsa, sentyabr oyida OFK prezidenti SHayx Salmon bin Ibrohim Al Xalifa rasmiy tashrif bilan yurtimizda mehmon bo'lib, tashrif davomida muhtaram yurtboshimiz SHavkat Mirziyoev bilan ham uchrashgan edi. Albatta, bu kabi uchrashuvlar o'z-o'zidan bo'lmaydi. SHu bois uchrashuvdan so'ng OFK rahbari O'zbekiston uchun qandaydir imtiyoz bermasa bo'lmasdi. Oradan ko'p o'tmay bizga bog'liq ajoyib xabar chiqdi: 2020 yilgi U-19 Osiyo chempionati O'zbekistonda bo'ladi.
Buni bemalol yaxshi yangilik deyish mumkin, zero keyingi yil yurtimizga 15ta jamoa keladi va biz birinchi marta yoshlar o'rtasidagi Osiyo chempionatini qabul qilamiz. SHu paytgacha ikki bor o'smirlar o'rtasidagi Osiyo chempionati Toshkentda o'tgandi, mana endi yoshlar o'rtasidagi qita birinchiligini OFK ishonch bilan O'zbekistonga topshirdi. O'zbekiston rasman mezbon deb elon qilingach, biz saralash bahslaridan ozod bo'ldik. Yani, o'yinlarni o'tkazganimiz bilan rasmiy maqomga ega bo'lmaydi.
Hozircha faqat Tojikiston masalani ijobiy hal etgan
Demak, kelasi yil O'zbekistonda bo'ladigan Osiyo chempionatida 16ta jamoa ishtirok etadi va musobaqa yakunida kuchli to'rtlikka kirgan jamoalar 2021 yil Indoneziyada o'tadigan U-20 jahon chempionatiga yo'llanma olishadi.
Saralash o'yinlarida qatnashishga OFKga azo 47 mamlakatdan 46tasi o'z roziligini bildirdi, faqat Filippin qatnashmaslikni lozim topdi. OFK o'z odatiga mos ravishda saralashni ikki mintaqaga bo'lib o'tkazishni maqul ko'rgan: SHarqiy va G'arbiy mintaqa. SHarqda 25, G'arbda 24 jamoa kurashadi.
Saralash bosqichi jamoalarni 11taga guruhga bo'lgan holda o'tkazish belgilab qo'yildi:
"A" guruhi - Iroq (mezbon), Ummon, Falastin, Quvayt, Pokiston.
"B" guruhi - Qatar (mezbon), Yaman, Turkmaniston, SHri Lanka.
"C" guruhi - Tojikiston (mezbon), Livan, Suriya, Maldiv.
"D" guruhi - Eron (mezbon), BAA, Qirg'iziston, Nepal.
"E" guruhi - Bahrayn (mezbon), Iordaniya, Bangladesh, Butan.
"F" guruhi - Saudiya Arabistoni (mezbon), O'zbekiston, Hindiston, Afg'oniston.
"G" guruhi - Kambodja (mezbon), Tailand, Malayziya, Bruney, SHimoliy Mariana orollari.
"H" guruhi - Xitoy Taypeyi (mezbon), Avstraliya, Makau, Laos.
"I" guruhi - Myanma (mezbon), Janubiy Koreya, Xitoy, Singapur.
"J" guruhi - Vetnam (mezbon), Yaponiya, Mo'g'uliston, Guam.
"K" guruhi - Indoneziya (mezbon), KXDR, Gonkong, Timor Leste.
Har bir guruhdagi bahslar mezbon sifatida ko'rsatilgan mamlakatlarda bo'lib o'tadi. Tojikistonda allaqachon saralash musobaqasi o'z yakuniga etib, Tojikiston U-19 terma jamoasi guruhda birinchi o'rinni egallagan holda Toshkentga yo'llanmani eng birinchi naqd qilgan. SHunday ekan, buyog'iga etiborimiz boshqa guruhlarga qaratiladi.
Boshqa guruhlarda o'yinlar boshlandimi?
Hozircha faqat "G" guruhida 2 noyabrdan o'yinlar boshlandi. Iroqda bo'lib o'tishi kerak bo'lgan "A" guruhi uchrashuvlari bazi sabablarga ko'ra nomalum muddatga qoldirildi. Qolgan guruhlarda o'yinlar ertaga boshlanadi.
SHu o'rinda saralash bosqichi formatini yodga olib o'tsak. 11ta guruh g'olibi hamda 4ta eng yaxshi ikkinchi o'rin egalari keyingi yil O'zbekistonda bo'lib o'tadigan U-19 Osiyo chempionati yo'llanmasini qo'lga kiritishadi. Saralashda konkursdan tashqari o'ynaydigan O'zbekiston o'z guruhida birinchi yo ikkinchi o'rinni egallasa, unda ikkinchi o'rindagilar orasida eng yaxshi ko'rsatkichga ega beshinchi jamoaga qo'shimcha imtiyoz beriladi.
Aytib o'tganimizdek, O'zbekiston mezbon bo'lgani uchun Saudiya Arabistonida kechadigan saralash katta ahamiyatga ega emas. SHunga qaramay Otabek G'ulomxo'jaev shogirdlaridan bo'shashmaslikni va ijobiy natija bilan qaytishlarini kutib qolamiz.
Bosh sahifaga
1657